قازاقپارات كۇنتىزبەسى: 26- تامىز
ەستە قالار وقيعالار
1920 -جىلى بۇكىل رەسەيلىك ورتالىق اتقارۋ كوميتەتى مەن حالىق كوميسسارلارى كەڭەسى قازاق اۆتونوميالىق كەڭەستىك سوتسياليستىك رەسپۋبليكاسىن قۇرۋ جونىندە ارنايى دەكرەت شىعاردى.
استاناسى رەتىندە ورىنبور قالاسى بەكىتىلدى. سەيىتقالي مەڭدەشيەۆ قازاق ا ك س ر ورتالىق اتقارۋ كوميتەتىنىڭ ءبىرىنشى ءتوراعاسى بولدى.
اۆتونوميالىق رەسپۋبليكا رەسەي سوتسياليستىك فەدەراتيۆتىك كەڭەستىك رەسپۋبليكاسىنىڭ بولىگى رەتىندە قۇرىلدى. قۇرامىنا پاۆلودار، سەمەي، وسكەمەن، زايسان، قارقارالى ۋەزدەرىنەن تۇراتىن سەمەي وبلىسى، اتباسار، اقمولا، كوكشەتاۋ، پەتروپاۆل ۋەزدەرىنەن جانە ومبى ۋەزىنىڭ ءبىر بولىگىنەن تۇراتىن اقمولا وبلىسى بەرىلدى.
ومبى ۋەزىنىڭ قازاق جانە سىبىر بولىكتەرىن ءدال مەجەلەۋدى قازريەۆكوم مەن سىبىريەۆكوم ءوزارا كەلىسىپ جۇزەگە اسىرادى دەپ ەسكەرتىلدى. رەسپۋبليكاعا، سونداي-اق تورعاي (قوستاناي، اقتوبە، ىرعىز، تورعاي ۋەزدەرىمەن)، ورال (ورال، ءىلبىشىن، تەمىر، گۋريەۆ ۋەزدەرىمەن) وبلىستارى، كاسپي سىرتى وبلىسىنىڭ ماڭعىستاۋ ۋەزى، وسى وبلىستاعى كراسنوۆودسك ۋەزىنىڭ 4- ءشى جانە 5- ءشى اداي بولىستارى، استراحان گۋبەرنياسىنان سينەمورسكايا بولىسى، بوكەي ورداسى، 1- ءشى جانە 2- ءشى تەڭىز جاعالاۋى وكرۋگتەرىنە جاپسارلاس بۇرىنعى قازىنالىق وبروك جەرلەرىنىڭ اۋماعى بەرىلدى.
تەڭىز جاعالاۋى جولاعى جانە سافرونوۆ، گانيۋشكين، نيكولايەۆ بولىستارى قازريەۆكومعا قاراتىلدى.
تۇركىستان رەسپۋبليكاسىنىڭ قۇرامىندا تۇرعان قازاق تەرريتوريالارىن قازاق رەسپۋبليكاسى قۇرامىنا قوسۋ سونداعى حالىقتىڭ ەرىك-جىگەرى ناتيجەسىندە جۇزەگە اسىرىلادى دەپ بەلگىلەندى.
1924-جىلى قۇرامىنا جەتىسۋ جانە سىرداريا وبلىستارى كىردى.
1998-جىلى تاراز قالاسىنداعى تاراز مەملەكەتتىك ۋنيۆەرسيتەتىنىڭ الدىنا ۇلى تاريحشى، شىعىستانۋشى، ويشىل، اقىن، قولباسشى مۇحامەد حايدار دۋلاتيگە ەسكەرتكىش ورناتىلدى.
1999-جىلى قازاق ۇلتتىق ۋنيۆەرسيتەتى عيماراتىندا اكادەميك ومىربەك جولداسبەكوۆكە ەسكەرتكىش تاقتا ورناتىلدى.
2005 -جىلى الماتىدا قازاقستان رەسپۋبليكاسى كونستيتۋتسياسىنىڭ 10 جىلدىق مەرەيتويىنا ارنالعان جاڭا كوركەم پوشتا ماركالارىنىڭ تانىستىرىلىمى بولىپ ءوتتى.
پوشتا ماركاسىندا قازاقستان رەسپۋبليكاسى كونستيتۋتسياسىنىڭ 10 جىلدىعىن تويلاۋ ءراسىمى بەينەلەنگەن. ماركا وفسەت ءادىسىن قولدانىلىپ ءتورت ءتۇرلى بوياۋمەن ورىندالعان. رەسىمدەۋشى - ر. جاپالوۆا. ق ح ر بايلانىس جانە اقپاراتتاندىرۋ مينيسترلىگى جانىنداعى قىتاي پوشتا ماركالارىنىڭ تيپوگرافياسىندا جاسالعان.
2010-جىلى وسكەمەندە قالاداعى ەڭ ۇلكەن ساعات ورناتىلدى. مەتالدان جاسالعان جاڭا قۇرىلىستىڭ بيىكتىگى 10 مەتر، ساعات باۋىنىڭ ەنى - 1 مەتر، 20 سانتيمەتر، سيفەربلاتىنىڭ ديامەترى - 3 مەتر.
2011 -جىلى استاناداعى ۇلتتىق تەننيس ورتالىعىنا ازيا تەننيس ورتالىعى دارەجەسى بەرىلدى. ەندى الەمدە ەكى ازيا تەننيس ورتالىعى بار - بىرەۋى بانگكوكتا، ەكىنشىسى - استانادا.
2011 -جىلى استاناداعى كۇلاش بايسەيىتوۆا اتىنداعى ۇلتتىق وپەرا جانە بالەت تەاترىنىڭ ساحناسىندا ۇلى قىرعىز جازۋشىسى شىڭعىس ايتماتوۆ پەن بەلگىلى قازاق دراماتۋرگى قالتاي مۇحامەدجانوۆتىڭ الەمگە ايگىلى «كوكتوبەدەگى كەزدەسۋ» سپەكتاكلى قويىلدى.
پەسا 30 جىلدان بەرى الەم تەاترلارى ساحناسىنان تۇسپەي كەلەدى. كەزىندە ول ۆاشينگتوندا، لوندوندا، توكيودا دا قويىلعان بولاتىن.
2013 -جىلى «التاي - تۇركى الەمىنىڭ التىن بەسىگى» اتتى Ⅱ حالىقارالىق فورۋم اياسىندا عىلىمي- تەحنيكالىق كونفەرەنتسيا وتكەن س. امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە «التاي تانۋ» ورتالىعى اشىلدى. ونىڭ جۇمىسىنا موڭعوليا، قىتاي، ر ف التاي ولكەسى، باسقا دا شەت ەلدەر قاتىستى.
2015 -جىلى سەۋلدە (وڭتۇستىك كورەيا) قازاق ۇلتتىق ونەر ۋنيۆەرسيتەتىنىڭ رەكتورى، ق ر حالىق ءارتىسى ايمان مۇساقوجايەۆاعا دانكۋك ۋنيۆەرسيتەتىنىڭ (وڭتۇستىك كورەيا) قۇرمەتتى PhD عىلىم دوكتورى اتاعى بەرىلدى. بۇل ديپلومدى الەمگە ايگىلى قازاقستاندىق سكريپكاشى ۋنيۆەرسيتەت پرەزيدەنتى حو-سۋنگ چانگتىڭ قولىنان الدى.
2016 -جىلى ەلباسى نۇرسۇلتان نازاربايەۆ 31-جازعى وليمپيادا ويىندارىنىڭ چەمپيوندارى مەن جۇلدەگەرلەرىن ماراپاتتاۋعا ارنالعان سالتاناتتى راسىمگە قاتىستى. ءراسىمدى اشقان مەملەكەت باسشىسى بارشا قازاقستاندىقتاردى ۇلتتىق قۇرامانىڭ ريو-دە-جانەيروداعى 31- جازعى وليمپيا ويىندارىندا تابىستى ونەر كورسەتۋىمەن قۇتتىقتاپ، چەمپيونداردى «بارىس» وردەنىمەن ماراپاتتادى.
2016 -جىلى وسكەمەندەگى ءۇلبى مەتاللۋرگيا زاۋىتىنىڭ اۋماعىندا تومەن بايىتىلعان ۋران بانكى عيماراتىنىڭ قۇرىلىسى باستالدى. ماگاتەنىڭ قازاقستاندى تاڭداۋىن ەلدىڭ حالىقارالىق ارەناداعى جوعارى بەدەلى مەن الەمدىك قوعامداستىقتىڭ قازاقستانعا دەگەن جوعارى سەنىمىنىڭ ايعاعى بولدى.
2017 -جىلى قاراعاندىدا روك جۇلدىزى ۆيكتور تسويعا ەسكەرتكىش قويىلدى. ترافارەت تۇرىندە جاسالعان ەسكەرتكىشتە كۇننىڭ تۇتىلۋى ورنەكتەلىپ، كۇننىڭ ىشىنە ۆيكتور تسويدىڭ كەسكىنى ءتۇسىرىلدى.
2019 -جىلى «قازاق پوەزياسىنىڭ ءىنجۋ- مارجاندارى» انتولوگياسى جارىققا شىقتى. اتالعان توپتاماعا 13 اقىننىڭ تۋىندىسى ەنگەن. ناقتىراق ايتقاندا، «قازاق پوەزياسىنىڭ ءىنجۋ- مارجاندارى» انتولوگياسىندا اباي، شاكارىم، ماعجان جۇمابايەۆ، قاسىم امانجولوۆ، جۇبان مولداعاليەۆ، جۇمەكەن ناجىمەدەنوۆ، تۇمانباي مولداعاليەۆ، قادىر مىرزا ءالى، مۇقاعالي ماقاتايەۆ، فاريزا وڭعارسىنوۆا، ولجاس سۇلەيمەنوۆ پەن مۇحتار شاحانوۆتىڭ ولەڭدەرى جيناقتالعان. 13 كىتاپتىڭ اربىرىنە پرەزيدەنت قاسىم-جومارت توقايەۆتىڭ ءوزى العى ءسوزىن جازدى.
مەملەكەت باسشىسى ءتول ادەبيەتىمىزدى ۇلىقتاپ، جاۋھار پوەزيامىزدى ۇرپاقتىڭ يگىلىگىنە اينالدىرۋ كەرەكتىگىن اتاپ وتكەن.
2019 -جىلى ابايدىڭ 175 جىلدىعى مەن ءابۋ ناسىر ءال-ءفارابيدىڭ 1150 جىلدىق مەرەيتويىن 2020-جىلى جوعارى ۇيىمداستىرۋشىلىق جانە مازمۇندىق دەڭگەيدە مەرەكەلەۋدى قامتاماسىز ەتۋ ماقساتىندا مەملەكەتتىك كوميسسيالار قۇرىلدى.
2019 -جىلى 398 سپورتشى قاتىسقان «Vienna Open» حالىقارالىق تۋرنيرىندە قازاقستاندىق شاحماتشى جانسايا ابدىمالىك ايەلدەر اراسىنداعى سايىستا ءبىرىنشى ورىنعا يە بولدى. قىزدار اراسىنداعى ۇزدىك ناتيجەسى ءۇشىن اتى اڭىزعا اينالعان نانا الەكساندريانىڭ قولىنان ارنايى سىيلىق الدى.
2019 -جىلى نۇر-سۇلتان قالاسىندا وتباسىلارعا زاڭگەرلىك، پسيحولوگيالىق جانە الەۋمەتتىك كومەك كورسەتەتىن «جانۇيا» ورتالىعى اشىلدى. ورتالىق «ءبىر تەرەزە» قاعيداتىمەن بارلىق قاجەتتى قىزمەتتەردى بىرىكتىرەدى.
اتاپ ايتقاندا، استانا تۇرعىندارىن جۇمىسپەن قامتۋ، كاسىپتىك وقىتۋ، بالاباقشاعا كەزەككە قويۋ تۋرالى جانە مەملەكەتتىك باعدارلامالار بويىنشا تولىق اقپارات تۇسىندىرىلەدى. «جانۇيا» وتباسى ينستيتۋتىن قولداۋ ورتالىعىندا 12 مەملەكەتتىك جانە كۆازيمەملەكەتتىك سەكتور جۇمىس ىستەيدى، ولار 70 كە جۋىق قىزمەت ءتۇرىن كورسەتەدى.
