بەيجىڭدە قازاقستان قارۋلى كۇشتەرىنىڭ 26 جىلدىعى اتالىپ ءوتتى
ءىس- شاراعا ق ح ر- داعى ق ر ەلشىسى شاحرات نۇرىشەۆ، قىتاي ۇلتتىق قورعانىس ۋنيۆەرسيتەتى بىرلەسكەن وپەراتسيالار ينستيتۋتى رەكتورىنىڭ ورىنباسارى، بەيجىڭ اككرەديتاتسيالانعان ديپلوماتيالىق وكىلدىكتەر باسشىلارى، 70 تەن استام شەتەلدىك مەملەكەتتىڭ اسكەري اتتاشەلەرى، شاڭحاي ىنتىماقتاستىق ۇيىمدارىنىڭ وكىلدەرى، ب ا ق جانە باسقالار قاتىستى.
قازاقستان مەن قىتايدىڭ مەملەكەتتىك ءانۇراندارى ورىندالعاننان كەيىن، قابىلداۋ قوناقتارىنا ق ح ر- داعى ق ر قورعانىس مينيسترلىگىنىڭ اسكەري اتتاشەسى ەركىن مامىتحانوۆ قازاقستان قارۋلى كۇشتەرىنىڭ تاريحى تۋرالى ايتىپ بەردى.
«قازاقستان قارۋلى كۇشتەرى اۋقىمدى جاڭارۋ ناتيجەسىندە بۇگىندە جوعارى موبيلدى، جاقسى جاراقتالعان جانە كاسىبي. ءبىز ب ۇ ۇ اياسىندا بىتىمگەرلىك ارەكەتتەرگە، سونداي-اق ش ى ۇ فورماتىندا حالىقارالىق اسكەري جانە انتيتەرروريستىك جانە باسقا دا ۇيىمداردىڭ وقۋ-جاتتىعۋلارىنا بەلسەندى قاتىسىپ كەلەمىز. قازاقستان حالىقارالىق اسكەري ويىندارعا باسا نازار اۋدارۋدا. بيىل قازاقستان وسى ويىنداردىڭ 3 كەزەڭىن ءوز اۋماعىندا وتكىزەدى»، - دەدى ول.
اسكەري ديپلومات قازاقستاننىڭ قىتايمەن جان-جاقتى اسكەري ىنتىماقتاستىقتى دامىتىپ جاتقاندىعىن اتاپ ءوتتى.
قىتايداعى يران ەلشىلىگىنىڭ اسكەري اتتاشەسى سايد الي ساماديا قازاقپاراتقا بەرگەن سۇحباتىندا قازاقستان قارۋلى كۇشتەرىنىڭ 26 جىلدىعىمەن قۇتتىقتادى.
«يران مەن قازاقستان قارۋلى كۇشتەرىنىڭ اراسىنداعى ىنتىماقتاستىقتىڭ جوعارى دەڭگەيدە ەكەندىگىن اتاپ وتكىم كەلەدى. تاياۋدا يراننىڭ اسكەري-تەڭىز كۇشتەرى كەمەلەرى قازاقستاننىڭ كاسپي تەڭىزىندەگى پورتىنا باردى جانە ولاردى جىلى قارسى الدى»، - دەدى ول.
ق ح ر- داعى ازەربايجان اسكەري اتتاشەسى، ەكىنشى دارەجەلى كاپيتان ەلچين دجافاروۆ ق ر قارۋلى كۇشتەرىنە وتاندى قورعاۋ جولىندا كۇش-قۋاتىنىڭ ارتا بەرۋىن تىلەدى.
«ءبىزدى بايلانىستىراتىن دۇنيە كوپ - تاريحي، مادەني بايلانىستار، مەملەكەت باسشىلارىنىڭ جىلى قاتىناستارى، جالپى حالىقتارىمىز باۋىرلاس. تاعى ءبىر بايلانىستىراتىن فاكتورلاردىڭ ءبىرى - كاسپي تەڭىزى، بۇل - بەيبىتشىلىك پەن دوستىقتىڭ ايدىنى»، - دەدى اسكەري ديپلومات.
قابىلداۋ اياسىندا استانا قالاسىنىڭ 20 جىلدىعىنا ارنالعان فوتو كورمە ءوتتى. قوناقتار الەمدەگى ەڭ جاس استانا - قازاقستان ەلورداسىنىڭ دامۋى مەن قۇرىلۋ تاريحىمەن تانىستى.
