ءبىر تاۋلىكتە 264 شاقىرىمعا شاپقان ايعىر
پوشىمىنا قاراپ، كوزدەن بۇل-بۇل ۇشقان ناعىز قازانات وسىنداي بولعان شىعار دەپ توپشىلادىق.
ويتكەنى، فوتونىڭ استىنا بۇل ايعىر ءبىر تاۋلىكتە 264 شاقىرىمدى شاۋىپ وتكەنى جازىلعان. ال سۋرەت بىرنەشە عالىمنىڭ اۆتورلىعىمەن 1964-جىلى ماسكەۋدە جارىق كورگەن جىلقى شارۋاشىلىعى تۋرالى كىتاپتىڭ قازاق جىلقىسى تۋرالى بولىمىندە بەرىلىپ وتىر.
سوندا، شامامەن 1948-1964-جىلدار ارالىعىندا تۇسىرىلگەن سۋرەت بولۋى مۇمكىن. ولاي دەيتىنىمىز، كىتاپتىڭ ءدال وسى بولىمىندە 1948-جىلى اداي جىلقىسىن مىنگەن بىرنەشە سالتاتتى ءبىر تاۋلىكتە 298 شاقىرىمدى ءجۇرىپ وتكەنى تۋرالى دا دەرەك كەلتىرىلىپتى.
«قازاق جىلقىسى مىنىسكە دە، جۇك ارتۋعا دا قاجىمايتىن ايرىقشا ءتوزىمدى بولىپ كەلەدى. جايىلىمدىق ازىقتى عانا قورەك ەتە ءجۇرىپ، كۇنىنە 80-90 شاقىرىم باسىپ وتۋگە قاۋقارلى. جاقىن قاشىقتىققا شاپقاندا اسا جىلدام بولماعانىمەن، الىسقا شاپقاندا كەرەمەت ناتيجە كورسەتەدى.
ماسەلەن، 1948-جىلى اداي جىلقىسىن مىنگەن بىرنەشە سالتاتتى ءبىر تاۋلىكتە 298 شاقىرىمدى ەڭسەردى. قازاق جىلقىسى قوسارلاپ جانە ۇشەۋلەپ جەككەندە دە 4,5-5 ساعاتتا 60-70 شاقىرىمدى ارتقا تاستاي الادى. 1948-جىلى قوسارلاپ جەككەن قازاق اتتارى ءبىر تاۋلىكتە 292 شاقىرىمدى ءجۇرىپ ءوتتى. اتتار تاعالانباعان ەدى، بۇل دا دالا جىلقىسىنىڭ تۇياعى مىقتى ەكەنىن كورسەتەدى»، دەپ تامسانا جازادى اۆتورلار.
