مىڭ تومنان تۇراتىن قارجى پيراميداسى ءىسى بويىنشا 25 ادام سوتتالدى
تەرگەۋ بارىسىندا ايىپتالۋشىلاردىڭ ەكى مىڭنان استام جابىرلەنۋشىگە 3 ميلليارد تەڭگەدەن استام شىعىن كەلتىرگەنى دالەلدەندى، دەپ حابارلايدى قازاقپارات ءتىلشىسى.
ايىپتالۋشىلار 2017-2020 -جىلدار ارالىعىندا «ەvolution Corporation» جانە «ينديگو 24» قارجى پيراميدالارىن قۇرىپ، حالىقتى الداپ كەلگەن. اتاپ ايتقاندا تۇركىستان، ماڭعىستاۋ، جامبىل وبلىستارى مەن شىمكەنت، استانا جانە الماتى قالالارىندا قارجى پيراميدالارىنىڭ جۇمىسىن جۇزەگە اسىرىپ كەلگەنى انىقتالدى. ولارعا قاتىستى قىلمىستىق ءىس مىڭنان اسا تومعا جيناقتالىپ، وبلىستىق سوتتا ءبىر جىلدان اسا ۋاقىت بويى قارالدى. ناتيجەسىندە سوت ۇيىمداسقان قىلمىستىق توپ باسشىسى مەن ەكى قۇرىلتايشىسىن 12 جىلعا باس بوستاندىعىنان ايىردى. قىلمىستىق توپ باسشىسىنىڭ سەنىمدى سەرىگى بولعان 5 ادام 10 جىلعا جازا ارقالادى. قالعان 17 ءسى 8 جىلعا قامالدى. ولار جازاسىن قىلمىستىق اتقارۋ جۇيەسىنىڭ ورتاشا قاۋىپسىز مەكەمەلەرىندە وتەيدى. سوتتالۋشىلاردىڭ ەڭ ۇلكەنى - 55 جاستاعى ايەل بولسا، ەڭ جاسى - 31 جاستا. بارلىعىنىڭ دۇنيە- مۇلكى تاركىلەنىپ، جازاسىن وتەپ شىققان سوڭ 7 جىلعا دەيىن قارجىلىق ۇيىمداردا جۇمىس ىستەۋىنە تىيىم سالىندى. بۇگىنگى سوت ۇكىمىنە ساي ءۇيقاماقتا وتىرعاندارى سوت زالىنان دەرەۋ قاماۋعا الىندى.
ەسكە سالايىق، ەكى مىڭنان استام جابىرلەنۋشى پوليسياعا 2020 -جىلدان باستاپ ارىزدانا باستاعان بولاتىن. ولار «ەvolution Corporation» مەن «ينديگو 24» ج ش س قارجى پيراميداسىنىڭ قۇربانى بولعانى جونىندە ارىزدانىپ، تەرگەۋدى تۇركىستان وبلىسى پوليسيا دەپارتامەنتىنىڭ تاجىريبەلى تەرگەۋشىلەر توبى جۇرگىزدى. سوتقا دەيىنگى تەرگەپ- تەكسەرۋ ءبىر جىلدان استام ۋاقىت بويى جالعاستى. ناتيجەسىندە قارجى پيراميداسىن قۇرۋعا جانە ونى باسقارۋعا قاتىسى بار دەگەن كۇدىكپەن پوليسيا قىزمەتكەرلەرى 25 ادامدى انىقتاپ، ۇستادى. ولاردان كومپيۋتەرلىك تەحنيكا، جىلجىمالى جانە جىلجىمايتىن مۇلىكتەر تاركىلەندى. تەرگەۋ كەزىندە ايىپتالۋشىلاردىڭ بىرنەشە جىلدار بويى سالىمشىلارعا اقشالارى ەسەلەپ قايتاتىنىن ۋادە ەتىپ، تۇرعىنداردان الاياقتىق جولمەن 3 ميلليارد تەڭگەدەن اساتىن قاراجاتتى يەمدەنگەنىن انىقتالدى.
