جاساندى ينتەللەكتىنى قولدانۋدان ەكونوميكالىق تيىمدىلىك 25 ميلليارد دوللارعا جەتۋى مۇمكىن - مامين

الماتى. قازاقپارات – ق ر پرەمەر-ءمينيسترى اسقار مامين الماتىدا ءوتىپ جاتقان ەۋرازيالىق ەكونوميكالىق وداق ەلدەرىنىڭ ۇكىمەتارالىق كەڭەستىڭ وتىرىسىندا جاساندى ينتەللەكتىنى دامىتۋ تۋرالى ءمالىم ەتتى.

ۇكىمەت باسشىسىنىڭ ايتۋىنشا، جاساندى ينتەللەكتىنى قولدانۋدان ەكونوميكالىق تيىمدىلىك 25 ميلليارد ا ق ش دوللارىنا جەتۋى مۇمكىن، دەپ حابارلايدى قازاقپارات ءتىلشىسى.

پرەمەر-مينيستر بۇگىندە سيفرلىق تەحنولوگيالاردىڭ قارىشتاپ دامۋى الەمدىك ەكونوميكاعا ەداۋىر ىقپال ەتىپ جاتقانىن ايتتى.

ونىڭ ىشىندە بولاشاقتا شەشۋشى ءرول اتقاراتىن جاساندى ينتەللەكتىنى دامىتۋعا باسا ءمان بەرىلۋدە.

اسقار ءماميننىڭ ايتۋىنشا، جاساندى ينتەللەكتىنى قولدانۋدان ەكونوميكانىڭ ءار سالاسىنا تۇسەتىن قوسىمشا قۇن 2030-جىلعا تامان 5 تريلليون ا ق ش دوللارىنا جەتۋى مۇمكىن.

«ۇزاق مەرزىمدى ماقساتىمىزدى ورىنداۋ جولىندا 2050-جىلعا تامان الەمنىڭ دامىعان 30 ەلىنىڭ قاتارىنا ەنۋ ءۇشىن جىل سايىن ەكونوميكانىڭ ءوسىمىن 5-6 پايىزعا كوتەرىپ وتىرۋدى كوزدەپ وتىرمىز. بۇل كورسەتكىشكە ەڭبەك ونىمدىلىگىن ارتتىرۋ كوپ ىقپال ەتۋى ءتيىس. وسى جەردە جاساندى ينتەللەكتىنىڭ الەۋەتى زور. قازاقستاندا جاساندى ينتەللەكتىنى دامىتۋدان ەكونوميكانىڭ سالالارىندا ەكونوميكالىق تيىمدىلىك جىلىنا 25 ميلليارد دوللارعا جەتۋى ءتيىس»، - دەدى اسقار مامين.

ونىڭ ايتۋىنشا، ەڭ جاقسى ءوسىم كورسەتكىشتەرى قىزمەت كورسەتۋ سالاسىندا - 15 ميلليارد دوللارعا، تاۋ-كەن وندىرىسىندە 9 ميلليارد دوللارعا جەتۋى ءتيىس.

ايتا كەتۋ كەرەك، الماتىدا «جاھاندىق ەكونوميكانىڭ سيفرلىق بولاشاعى» فورۋمى ءوتىپ جاتىر.

بۇل شاراعا ارمەنيا، بەلارۋس، قازاقستان، قىرعىز رەسپۋبليكاسى، رەسەي فەدەراتسياسىنىڭ، مولدوۆا ۇكىمەتىنىڭ باسشىلارى مەن پرەمەر-مينيسترلەرى قاتىسىپ جاتىر.

ماڭىزدى كەزدەسۋدە كۇن تارتىبىنە 12 ماسەلە قويىلعان.