كيەلى جەرلەر كارتاسىنا سولتۇستىك قازاقستانىڭ 25 نىسانى كىردى
بىلتىر ءبىرقاتارىنا جوندەۋ جۇمىسى جۇرگىزىلدى، دەپ حابارلايدى قازاقپارات ءتىلشىسى.
ايىرتاۋ اۋدانىندا ورنالاسقان قاراساي مەن اعىنتاي باتىرلاردىڭ مەموريالدىق كەشەنى، بوتاي قونىسى، سىرىمبەت ۋسادباسى، «ابىلاي حان رەزيدەنتسياسى» مۋزەي كەشەنى، جامبىل اۋدانى بلاگوۆەشەنكا اۋىلىندا ورنالاسقان قوجابەرگەن جىراۋدىڭ كەسەنەسى، ابىلاي حاننىڭ ۇزەڭگىلەس سەرىگى قۇلسارى باتىردىڭ كەسەنەسى، تايىنشا اۋدانىنىڭ وزەرنوە اۋىلىنداعى «قازاقستان جۇلدىزى» التارى - بۇلاردى س ق و اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ پورتالىنداعى «كيەلى جەرلەر بويىنشا 3D تۋرلار» جوباسىنان كورۋگە بولادى.
17- عاسىردا ەسىم حاننىڭ تۇسىندا ءومىر سۇرگەن، شاپىراشتى رۋىنان اتاقتى قاراساي جانە ارعىن رۋىنان شىققان اعىنتاي باتىرلاردىڭ ەكەۋى دە قۇلشىنباي توبەسىندە جەرلەنگەن. 1999-جىلى جاۋىنگەرلەر جەرلەنگەن بيىك توبەگە كەسەنەسىمەن مەموريالدىق كەشەن سالىندى. كونۋس ءتارىزدى 16 مەترلىك مۇنارالاردى ولاردىڭ اراسىندا ورنالاسقان مەشىت قوسادى.
مەموريالدىق كەشەندى كورۋگە، ءمىناجات ەتۋگە جىل سايىن ەلىمىزدىڭ تۇپكىر-تۇپكىرىنەن جۇزدەگەن ادام، كوپتەگەن شەتەلدىك قوناقتار كەلەدى. ەلباسى نۇرسۇلتان نازاربايەۆ تا وسىندا ەكى رەت بولدى.
قاجىلىققا كەلۋشىلەر مەن تۋريستەر ءۇشىن كەسەنەنىڭ جانىندا مەيمانحانا سالىنعان. قاراساي باتىر ەسىمى اۋىل اتىنا بەرىلدى. كەسەنەگە جاس وتاۋ يەلەرى كەلەدى, وسى جەردەن اسكەرگە، وقۋعا شىعارىپ سالادى.
س ق و كاسىپكەرلىك جانە تۋريزم باسقارماسىنىڭ مالىمەتىنشە، بىلتىر جالپى ۇلتتىق تىزىمگە ەنگەن قاراساي مەن اعىنتاي باتىرلاردىڭ مەموريالدىق كەشەنىنە جوندەۋ جۇمىستارى جۇرگىزىلدى. ناتيجەسىندە نىساننىڭ شاتىرى تولىق اۋىستىرىلىپ، ماڭايىنا گرانيت تاس توسەلدى، ەكى مازاردىڭ قاپتاماسى جاڭالاندى.
بۇدان باسقا سارىتومار اۋىلىنداعى ماعجان جۇمابايەۆ مۋزەيىنە اعىمداعى جوندەۋ جۇمىسى جۇرگىزىلدى. قاسيەتتى ورىندارعا اپاراتىن 43 شاقىرىم جول كۇردەلى جوندەلدى.
جالپى، س ق و- دا كيەلى جەرلەردى كوپشىلىككە تانىتۋ، انىقتاپ، ولاردى ابباتتاندىرۋ جۇمىستارى بيىل دا جالعاسىن تاپپاق. مامانداردىڭ ايتۋىنشا، كيەلى جەرلەر كارتاسىنا ارحەولوگيا جانە ساۋلەت ەسكەرتكىشتەرىن عانا ەمەس، تابيعي نىسانداردى دا ەنگىزۋ جوسپارلانعان.
