20:37, 23 - تامىز 2017 | GMT +6
لوتەرەياداعى الاياقتىعى ءۇشىن باعدارلاما جاساۋشى 25 جىلعا سوتتالدى
استانا. قازاقپارات - ا ق ش- تا شتاتارالىق لوتەرەيا قاۋىمداستىعىنىڭ بۇرىنعى باعدارلاماشىسى ەددي تيپتون لوتەرەيا بيلەتتەرى ارقىلى جاساعان الاياقتىعىنان سوڭ سوت شەشىمىمەن 25 جىلعا باس بوستاندىعىنان ايىرىلدى.
ول كەلتىرگەن شىعىن 2 ميلليون دوللاردى قۇراعان.
بۇل تۋرالى Fox News ارناسى حابارلادى.
ايىپتاۋلارعا سايكەس، تيپتون سانداردىڭ ءتۇسۋىن بولجايتىن كود ويلاپ تاپقان. سول ارقىلى ۇتىس نومىرلەرىن الدىن الا ءبىلىپ، تانىستارىنا حابارلاپ وتىرادى.
ۇتىستان كەيىن ولار اقشانى ءوزارا ءبولىپ الاتىن بولعان. ناتيجەسىندە، باعدارلاما جاساۋشى 14 ميلليون دوللار ۇتىسىن الۋعا كەلگەن كەزدە ونى تۇتقىندادى.
تيپتون بار كىناسىن مويىنداپ وتىر. ەندى ول زاڭسىز تۇردە تاپقان بار اقشاسىن قايتارۋى ءتيىس.