تۇرعىن ءۇي قۇرىلىس جيناق بانكى 25 -ماۋسىمدا وتەماقىنى تولەي باستايدى
ونىڭ 8,6 ميلليارد تەڭگەسى بانكتىڭ جەكە قاراجاتىنان بولىنبەك.
«وتەماقى، ءبىرىنشى كەزەكتە، 2016 -جىلدىڭ 31- مامىرىنا دەيىن بانكپەن قوسىمشا كەلىسىمگە قول قويىپ ۇلگەرگەن سالىمشىلارعا تولەنەدى. 221 705 سالىمشى 122,9 ميلليارد تەڭگەنى قۇرايتىن دەپوزيتتىڭ جالپى سوماسىنان وتەماقى الادى»، - دەپ مالىمدەيدى تۇرعىن ءۇي قۇرىلىس جيناق بانكىنىڭ باسپا ءسوز قىزمەتى.
ق ت ق ج ب 1- ماۋسىمدا وتەماقى الۋعا قوسىمشا كەلىسىم جاساۋ مەرزىمى ءبىر ايعا ۇزارعانىن حابارلاعان ەدى. قازىرگى تاڭدا، وتەماقى تولەۋگە جاتاتىن 452 167 سالىمنىڭ 140 464 شارتىنا ءالى دە قول قويىلماعان. ولاردىڭ باسىم بولىگى شوتتارىندا 1 ميلليون تەڭگەدەن از سوما جاتقان كليەنتتەر. بانكتىڭ باسپا ءسوز قىزمەتى قوسىمشا كەلىسىمگە قول قويۋعا سوڭعى 8 كۇن قالعانىن ەسكەرتىپ وتىر. ۇلگەرمەگەن جاعدايدا ول سالىمشىلار وتەماقىدان قاعىلادى.
وتەماقىنىڭ العاشقى ترانشىنىڭ قالعان 9,3 ميلليارد تەڭگەسى اعىمداعى جىلدىڭ 1 -تامىزىنا دەيىن بەرىلەدى. ول قاراجاتتى ۋاقىتىندا قوسىمشا كەلىسىم جاساپ ۇلگەرمەي، ۇزارتىلعان ۋاقىتتا كەلىسىم جاساسقان سالىمشىلار الادى.
بانك سالىمشىلارىنا باعام ايىرماسىنىڭ ەكىنشى ترانشى تولىق كولەمدە 2017 -جىلدىڭ 1 -شىلدەسىنە دەيىن تولەنەدى.
جالپى العاندا، وتەماقى كولەمى %35,5- دى قۇرايدى. سالىمشىلارعا 2016 -جىلى %19,2 نەمەسە 32,9 ميلليارد تەڭگە، ال 2017 -جىلى %16,3 وتەماقى تولەنەدى. ول 28 ميلليارد تەڭگەنى قۇرايدى.
