قازاقستان تاۋەلسىزدىگىنىڭ 25 جىلدىعىنا وراي تۇركى مادەنيەتى مەكسيكادا ۇلىقتالادى
مارتەبەلى مەيماندى قارسى العان اكادەميا باسشىسى دارحان قىدىرالى ۇيىمنىڭ قىزمەتى مەن عىلىمي جوبالارى جايىندا كەڭەيتىلگەن مالىمەت بەردى، سونىمەن قاتار ۇيىمنىڭ حالىقارالىق بايلانىستارىن دا تىلگە تيەك ەتتى.
اكادەميا جۇمىسىنا زور قىزىعۋشىلىق تانىتقان مارتا بارسەنا حانىم ۇيىممەن عىلىم، ءبىلىم، مادەنيەت سالالارىندا ارىپتەستىك بايلانىس ورناتۋعا ىقىلاستى ەكەنىن ايتتى. «مەكسيكا - يسپان تىلىندە سويلەيتىن ەڭ ۇلكەن مەملەكەت قانا ەمەس، سونىمەن قاتار كونە مايا مەن اتستەكتەر وركەنيەتى ساقتالعان ەل.
ال، امەريكا قۇرلىعىنداعى ءۇندى تايپالارىنىڭ تاريحي وتانى ورتا ازيا ەكەنى بەلگىلى. بۇل تاريحي بايلانىس ءبىز ءۇشىن قىزىق، ءارى ماڭىزدى. بۇگىندە مەكسيكادا تۇركى مەملەكەتتەرى مەن تۇركى مادەنيەتىنە دەگەن قىزىعۋشىلىق زور بولعانىمەن، دەرەك از. سوندىقتان ءبىز سىزدەرمەن بايلانىس ورناتۋ ارقىلى مەكسيكانىڭ تۇركى تىلدەس مەملەكەتتەرمەن مادەني، تاريحي ينتەگراتسياسىن نىعايتا تۇسپەك نيەتتەمىز»، - دەدى ەلشى حانىم.
كەزدەسۋگە قاتىسقان تۇركى مەملەكەتتەرى اقساقالدار كەڭەسىنىڭ مۇشەسى، TWESCO پروفەسسورى ءادىل احمەتوۆ ءوزىنىڭ عىلىمي تاقىرىپتارىنىڭ ءبىرى - امەريكالىق ۇندىستەردىڭ ورتا ازيا، ونىڭ ىشىندە التاي ايماعىنان تاراعانى جونىندەگى تۇجىرىمدارىمەن ءبولىستى.
ەكىجاقتى كەزدەسۋ بارىسىندا قارىم-قاتىناس ورناتۋ مەن دامىتۋ باعىتتارى تالقىلانىپ، سايكەس ۇيىمدار مەن TWESCO اراسىندا مەموراندۋم بەكىتۋ مۇمكىندىكتەرى قاراستىرىلدى.
مەكسيكالىقتار مەن قازاق حالقىنىڭ مادەني جاقىندىعىن اتاپ وتكەن مارتا بارسەنا حانىم تۇركى حالىقتارى، ونىڭ ىشىندە قازاق عالىمدارى مەن ادەبيەتشىلەرىنىڭ كىتاپتارىن يسپان تىلىنە اۋدارۋعا نيەت تانىتتى. سونداي-اق، مەكسيكا ادەبيەتىن تۇركى تىلدەرىنە اۋدارىپ باسۋعا كومەك كورسەتۋگە ءازىر ەكەندىگىن ءبىلدىردى.
كەزدەسۋ بارىسىندا TWESCO باسشىسى دارحان قىدىرالى ىنتىماقتاستىق ورناتىپ، ورتاق عىلىمي جوبالار جۇرگىزۋگە قاتىستى ناقتى ۇسىنىستارىن ورتاعا سالدى. وسى ماقساتتا اتقارىلاتىن العاشقى قادامدار دا ناقتىلاندى. اتاپ ايتقاندا، تاراپتار كۇز ايلارىندا ورتا ازياداعى تۇركى مەملەكەتتەرى تاۋەلسىزدىگىنىڭ 25 جىلدىعى قۇرمەتىنە مەكسيكادا كونە مايا مادەنيەتىن زەردەلەۋگە ارنالعان ورتاق عىلىمي سەمينار مەن كورمە ۇيىمداستىرۋ جونىندە الدىن-الا ۋاعدالاستى. بۇدان بولەك، تاريح، ادەبيەت، ارحەولوگيا جانە انتروپولوگيا سالاسىندا عىلىمي جوبالار جۇرگىزۋ تۋرالى كەلىسىلدى.
كەزدەسۋ سوڭىندا ۇيىم باسشىسى مارتا بارسەنا حانىمعا اكادەميانىڭ قۇندى كىتاپتارىن تارتۋ ەتتى.
