14:48, 12 - اقپان 2016 | GMT +5
ن. نازاربايەۆ و. سۇلەيمەنوۆپەن سەمەي يادرولىق پوليگونى جابىلۋىنىڭ 25 جىلدىعىنا دايىندىقتى تالقىلادى
استانا. قازاقپارات - ەلباسى نۇرسۇلتان نازاربايەۆ جازۋشى جانە قوعام قايراتكەرى ولجاس سۇلەيمەنوۆپەن كەزدەستى، دەپ حابارلايدى اقوردانىڭ باسپا ءسوز قىزمەتى.
كەزدەسۋ بارىسىندا قازاقستاننىڭ قارۋسىزدانۋ جانە يادرولىق قارۋدى تاراتپاۋ سالاسىنداعى قىزمەتىنىڭ نەگىزگى باعىتتارى تالقىلاندى.
سونىمەن قاتار پرەزيدەنت نۇرسۇلتان نازاربايەۆتىڭ سەمەي يادرولىق پوليگونىن جابۋ تۋرالى جارلىعىنا قول قويعانىنا 25 جىل تولۋى اياسىندا وتەتىن شارالارعا دايىندىق ماسەلەلەرى قاراستىرىلدى.
نۇرسۇلتان نازاربايەۆ كۇردەلى گەوساياسي جاعدايدى ەسەپكە الا وتىرىپ، حالىقارالىق اۋقىمدا بەيبىتشىلىك پەن قاۋىپسىزدىك پرينتسيپتەرىن العا جىلجىتۋدىڭ ماڭىزدىلىعىن اتاپ ءوتتى.
ءوز كەزەگىندە، و. سۇلەيمەنوۆ جاھاندىق يادرولىق قارۋعا قارسى قوزعالىستا مەملەكەتتەردىڭ عانا ەمەس، سونىمەن قاتار قوعامدىق ۇيىمداردى، ازاماتتىق باستامالاردى بىرىكتىرۋ قاجەتتىلىگىنە نازار اۋداردى.
