ماڭعىستاۋعا بيىل 250 مىڭعا جۋىق تۋريست كەلگەن
وڭىرلىك تۋريزم باسقارماسىنىڭ باسشىسى ماۋلەن عابدۋلقاليەۆتىڭ سوزىنشە، رەسمي ستاتيستيكاعا سايكەس تۋريستەر سانى 250 مىڭعا جۋىقتاسا، تىركەلمەگەندەردى قوسا ەسەپتەگەندە شامامەن 500 مىڭ بولادى.
ماڭعىستاۋعا ساياحاتتاپ كەلگەندەر كوبىنە قارامان اتا جەراستى مەشىتىنە ايالدايدى. كيەلى ورىنعا كەلەتىن زياراتشىلار سانى وتكەن جىلمەن سالىستىرعاندا ەكى ەسە وسكەن.
«قارامان اتا ءوز زامانىندا قاسيەتى ءبىراز ەلگە تارالعان، بەدەلدى، اق پەن قارانى ايىراتىن ءادىل، كيەسى بار ادام بولعان. جەراستى مەشىتىندە ادام ەمدەپ، شاكىرتتەرىن تاربيەلەگەن دەگەن اڭىز دا بار. سول سەبەپتى، بۇل قاسيەتتى مەكەنگە اۋرۋىنا شيپا ىزدەپ، پەرزەنت تىلەپ كەلىپ جاتادى. جىل سايىن جەراستى مەشىتىنە ارنايى باس سۇعىپ، ساداقا بەرىپ، قۇران باعىشتاپ، شيپا ىزدەپ كەلۋشىلەر سانى ارتىپ كەلەدى. بۇل - قۋانتارلىق جايت»، - دەدى ماڭعىستاۋ اۋدانىنىڭ تۇرعىنى، قارامان اتا جەراستى مەشىتىنە زياراتتاپ كەلۋشى ءازىرباي بەكەيەۆ.
سونداي-اق، تۋريستەردىڭ باسىم كوپشىلىگى قازاق حالقىنىڭ تۇرمىس-تىرشىلىگى مەن مادەنيەتىن، سالت-ءداستۇرىن دارىپتەيتىن مەكەننىڭ ءبىرى - «كوگەز» ەتنواۋىلىنا دا تۇراقتايدى. ەتنواۋىل ديرەكتورى ەۆگەنيا سليۋساريەۆانىڭ ايتۋىنشا، قاز-قاتار كيىز ۇيلەر تىگىلىپ، ۇلتتىق ناقىشتا بەزەندىرىلگەن دەمالىس ورنىنا شەتەلدىك تۋريستەردىڭ كەلۋى جيىلەي ءتۇستى. ولاردىڭ اراسىندا، كورەيا، يتاليا جانە رەسەي ەلدەرىنىڭ ازاماتتارى بار.
«كوگەز» ەتنوگرافيكالىق قازاق اۋىلىندا تۋريستەر مەن جولاۋشى قوناقتار ءۇشىن 15 كيىز ءۇي تىگىلگەن. ءۇش بىردەي كاتەگوريا بويىنشا قوناقتارعا قىزمەت ۇسىنىلادى. كيىز ءۇيدىڭ ءبىرى تاماق ىشۋگە، وزگە ءبىرى جاتىن ورىن، ال ءۇشىنشىسى سۋرەتكە تۇسۋگە ارنالعان. ەتنواۋىلعا كۇنىنە 5-10 جولاۋشى كەلەدى. ولاردىڭ قىزىعۋشىلىعى ەرەكشە»، - دەدى ەۆگەنيا سليۋساريەۆا.
