ساتۋعا قويىلعان پوليتسيا كولىكتەرىنىڭ باعاسى 250 مىڭنان باستالادى

الماتى. قازاقپارات - الماتى قارجى باسقارماسى بۇرىن پوليتسەيلەرگە تيەسىلى بولعان اۆتوكولىكتەردى ساتىلىمعا شىعاردى، دەپ حابارلايدى قازاقپارات ءتىلشىسى.

اۆتوكولىكتەردىڭ باستاپقى باعاسى 250 مىڭ تەڭگەنى قۇرايدى، ال ولاردىڭ جاعدايىنىڭ قانداي ەكەنىن gosreestr.kz ەلەكتروندى ساۋدا الاڭىنان بىلۋگە بولادى.

 

ساتىپ الۋشىلارعا 2009-2011 - جىلدارى شىعارىلعان Daewoo Nexia, Volkswagen Santana Vista, ГАЗ «142705»  ماركالى كولىكتەر ۇسىنىلادى. بۇلاردىڭ باعالارى 250 مىڭ تەڭگەدەن باستالىپ، 400 مىڭعا دەيىن بارادى.
 

ساۋداعا قاتىسام دەۋشىلەر  37529 تەڭگە كولەمىندە كەپىلدىك تولەۋى كەرەك. ءباسساۋدا بيىل 11 - شىلدەدە باستالادى.

 

بۇل اۆتوكولىكتەر بۇرىن الماتى ىشكى ىستەر دەپارتامەنتىنە تيەسىلى بولعان.

 

 ءباسساۋدا شارتى بويىنشا، اۆتوكولىك ەڭ جوعارى باعا ۇسىنعان قاتىسۋشىعا ساتىلادى.

 

ال ءباسساۋدا اياقتالار ۋاقىتقا دەيىن باعانى ەشكىم كوتەرمەسە، سوڭعى تىلەك بىلدىرگەن ادام جەڭىمپاز سانالادى.

 

 ايتا كەتۋ كەرەك، ءباسساۋدا ناتيجەسى بويىنشا ساتىلعان نىساندارعا حاتتاما تولتىرىلىپ، ساۋدا ناتيجەسى ساتۋشى مەن ساتىپ الۋشىنىڭ ەلەكتروندى كىلتىن قولدانۋ ارقىلى رەەستر پورتالىندا راستالادى.

 

 بۇدان وزگە، ساتىپ الۋ - ساتۋ شارتى رەەستر پورتالىندا ەلەكتروندى فورماتتا بەكىتىلەدى. ساۋدا ناتيجەسى تۋرالى حاتتاماعا قول قويىلعان كۇننەن باستاپ 10 كۇننىڭ ىشىندە شارت ەكىجاقتىڭ ەلەكتروندى كىلتىمەن راستالۋى قاجەت.

اۆتور: ارايلىم جولداسباي