گەرمانيادا سوڭعى 250 جىلدا العاش رەت پايدا بولعان جابايى وگىز ءولتىرىلدى
دۇنيەجۇزىلىك جابايى تابيعات قورىنىڭ وكىلدەرى بار ايىپتى قالا بيلىگىنە ارتىپ وتىر. بۇل جايلى اعىلشىننىڭ The Independent باسىلىمى حابارلايدى.
ادامدار سيرەك كەزدەسەتىن وگىزدى بەرليننەن نەبارى 88 شاقىرىم قاشىقتىقتا ورنالاسقان لەبۋس قالاسى ارقىلى وتەتىن ودرا وزەنىنىڭ جاعاسىنان بايقاعان. ەكى ەلدىڭ شەكاراسىندا ورنالاسقان پولياكتاردىڭ «ۋيستسە-ۆارتا» ۇلتتىق ساياباعىندا مەكەندەيتىن جانۋار بۇل ايماققا اداسىپ كەلگەن دەگەن بولجام بار.
وگىزدەن قاۋىپتەنگەن قالا بيلىگى ونى ولتىرۋگە شەشىم قابىلداعان. قور سايتىندا اتالعان وگىزدىڭ ادام ومىرىنە قاۋپى جوقتىعى جازىلعان. بۇل جانۋار حالىقارالىق تابيعاتتى قورعاۋ وداعىنىڭ قىزىل تىزىمىنە ەنگىزىلگەن.
1927-جىلى ولار جابايى تابيعاتتا جوعالىپ بارا جاتقان جانۋارلار رەتىندە مويىندالعان. قازىر جابايى وگىزدەر الەمنىڭ 30 ەلىندە مەكەندەيدى، ولاردىڭ قاتارىندا پولشا، ليتۆا، بەلارۋس، ۋكراينا، رەسەي جانە سلوۆاكيا اۋماعىنداعى قورىقتار دا بار.
