قازاقستاننان 2500 ادام وسى ايدىڭ سوڭىندا قاجىلىققا اتتانادى
قازاقستان مۇسىلماندار ءدىني باسقارماسىنىڭ قاجىلىق ءبولىمىنىڭ مەڭگەرۋشىسى بەيبىت مىرزاگەلديەۆتىڭ حابارلاۋىنشا، قاجىلىق ساپارى الماتى، استانا جانە شىمكەنت قالالارىنان تىكەلەي رەيسپەن ورىندالادى. جالپى قاجىلىق 22-25 - تامىزدىڭ ارالىعىندا باستالىپ، قىركۇيەك ايىنىڭ 6-10 ارالىعىندا اياقتالادى. قازىرگى تاڭدا رەسپۋبليكا بويىنشا 2500 ادام قاجىلىققا بارۋدى جوسپارلاپ وتىر. ولاردى مەككەگە اپارۋدى 16 تۋريستىك اگەنتتىك ىسكە اسىرماق.
ق م د ب- نىڭ ۇيىمداستىرۋىمەن قاجىلىققا باراتىنداردى ساۋد ارابياسىنىڭ «فلايناس» جانە قازاقستاندىق «Scat» اۋە كومپانيالارى تاسىمالدايتىن بولادى. ياعني، 1250 ادامدى قازاقستاندىق كومپانيانىڭ ۇشاقتارى اپارسا، قالعان جارتىسىنا شەتەلدىك اۋە كومپانياسى قىزمەت كورسەتپەك. وتكەن جىلى قاجىلىققا باراتىنداردى اۋە تاسىمالداۋى باعىتىندا ماسەلە تۋىنداعان. بيىل «Scat» اۋە كومپانياسى ساۋد ارابيا جاعىمەن ورتاق كەلىسىمگە كەلىپ، ءتيىستى رۇقسات الىپ وتىر.
ايتا كەتەرلىگى، وتكەن جىلى قازاقستاننان 3 مىڭ ادام قاجىلىققا بارعان ەدى. ال ساۋد ارابياسى ۇكىمەتى بيىل قاجىلىققا كەلەتىندەردىڭ سانىن وتكەن جىلعىدان گورى 800 مىڭعا ارتتىرىپ، ولاردىڭ سانىن 2,6 ميلليون ادامعا جەتكىزۋدى جوسپارلاپ وتىر.
اۆتور: ايان بەكەن ۇلى
