قازاقستاندا عىلىمي قىزمەتكەرلەردىڭ سانى 25,8 مىڭ ادامعا ءوستى - ا. ءسارىنجىپوۆ

الماتى. قازاقپارات - بۇگىن الماتىدا «عىلىم ورداسى» ر م ك كەشەنىندە «ەلباسى ن. ءا. نازاربايەۆتىڭ بەس ينستيتۋتسيونالدى رەفورمالارىن ىسكە اسىرۋ اياسىندا قازاقستان عىلىمىن دامىتۋ» اتتى عىلىمي- پراكتيكالىق كونفەرەنتسيا بولدى.

«2014 - جىلى عىلىمي زەرتتەۋلەرگە جۇمسالعان قارجىنىڭ كولەمى 66,4 ميلليارد تەڭگەنى قۇرادى. ال بۇل، مىسالى، 2010 -جىلمەن سالىستىرعاندا 2,5  ەسە ارتىق. 2011 - جىلدان باستاپ، قازاقستاندىق عالىمدار Thomson Reuters, Springer جانە Elsevier سەكىلدى الەمدىك اقپارات رەسۋراستارىنا تەگىن قول جەتكىزە الاتىن بولدى»، - دەدى ق ر ءبىلىم جانە عىلىم ءمينيسترى اسلان ءسارىنجىپوۆ.

 ونىڭ ايتۋىنشا، سوڭعى جىلدارى عىلىمي قىزمەتكەرلەردىڭ سانى ارتا تۇسۋدە. 2009 - جىلى ولاردىڭ سانى 15 مىڭ بولسا، قازىرگى تاڭدا عىلىمي قىزمەتكەرلەردىڭ جالپى سانى 25,8  مىڭ ادامعا جەتكەن. جاسى 35 كە جەتپەگەن عالىمداردىڭ سانى 38 پايىزعا ءوسىپ وتىر. ونەرتابىستار مەن يننوۆاتسيالارعا 1400 استام پاتەنتتەر الىنعان. ال باعدارلامالىق- نىسانالى قارجىلاندىرۋ شەڭبەرىندە قازىر 105 عىلىمي- تەحنيكالىق باعدارلاما ىسكە اسىرىلۋدا.

«قازىرگى تاڭدا عىلىم مەن ەكونوميكا سەكتورلارىنىڭ ءوزارا بايلانىسىن نىعايتۋ ماسەلەلەرى شەشىلۋدە. مينيسترلىك تەحنولوگيالاردى كوممەرتسيالاندىرۋمەن اينالىسىپ جاتىر. وتكەن جىلدىڭ قورىتىندىسى بويىنشا 118 جوبانىڭ ناتيجەلەرى وندىرىستە قولدانىلدى. مۇنداي شارالاردى جۇزەگە اسىرۋ وتاندىق عىلىمنىڭ ەكونوميكالىق تيىمدىلىگىن ارتتىرۋعا سەپتىگىن تيگىزەدى»، - دەدى مينيستر.

كونفەرەنسيا جۇمىسىنا قازاقستاننىڭ اكادەميكتەرى مەن عالىمدارى، ۇلتتىق عىلىمي كەڭەستىڭ مۇشەلەرى، جوعارى وقۋ ورىندارىنىڭ جانە عىلىمي ۇيىمداردىڭ، ۇجىمدىق جانە زەرتحانالىق قولدانىستاعى زەرتحانالاردىڭ باسشىلارى، عىلىم مەن جوعارى ءبىلىم بەرۋ سالاسىنىڭ باسقا دا قىزمەتكەرلەرى، سونداي- اق قر پارلامەنتىنىڭ دەپۋتاتتارى قاتىستى.

بۇگىنگى شارا اياسىندا ۇزدىك عىلىمي جەتىستىكتەر مەن 2011-2014 - جىلداردىڭ قورىتىندىسى بويىنشا قازاقستاندىق عالىمداردىڭ عىلىمي زەرتتەۋلەرىنىڭ ناتيجەلەرىن كورسەتىپ، جاريالاۋعا باعىتتالعان وتاندىق عىلىمنىڭ جەتىستىكتەرى كورمەسى ۇيىمداستىرىلدى.

كونفەرەنسيا سوڭىندا جەتەكشى عالىمدار مەن عىلىمي قىزمەتكەرلەر «قازاقستان رەسپۋبليكاسىنىڭ عىلىمىن دامىتۋعا سىڭىرگەن ەڭبەگى ءۇشىن»، «قازاقستان رەسپۋبليكاسىنىسڭ ءبىلىم بەرۋ سالاسىنىڭ ارداقتى قىزمەتكەرى» توسبەلگىلەرىمەن جانە ق ر ءبىلىم جانە عىلىم ءمينيسترىنىڭ قۇرمەت گراموتاسىمەن ماراپاتتالدى.

اۆتور: جاپپاربەرگەن ايبوتا