تالدىقورعاندا ستۋدەنتتەردىڭ اتىنان 24 ميلليون تەڭگە نەسيە العان كومەندانت سوتتالدى

تالدىقورعان. قازاقپارات - جەتىسۋ وبلىسى تالدىقورعان قالالىق سوتى بىرنەشە رەت جاسالعان الاياقتىق جاساپ، ستۋدەنتتەردىڭ اتىنان نەسيە راسىمدەگەن كومەندانت س- عا قاتىستى قىلمىستىق ءىستى قارادى.

پروتسەسس قك 190-بابىنىڭ 3-بولىگى 4-تارماعىندا كوزدەلگەن ءىس اياسىندا ءوتتى، دەپ حابارلايدى قازاقپارات.

سوتتالۋشى س. جوعارعى وقۋ ورنىنا قاراستى جاتاقحانانىڭ كومەندانتى قىزمەتىن اتقارا ءجۇرىپ، 2021-2022-جىلدار ارالىعىندا ستۋدەنتتەر مەن جاتاقحانا قىزمەتكەرلەرىنىڭ سەنىمىنە كىرىپ، الاياقتىق جولمەن ينتەرنەت-بانكينگ قىزمەتى ارقىلى تاۋارلى جانە اقشالاي نەسيە رەسىمدەگەن.

باس-اياعى 16 جابىرلەنۋشىگە جالپى كولەمى 24 ميلليوننان استام سومادا ماتەريالدىق شىعىن كەلگەن.

سوتتالۋشى س. 2021-جىلدىڭ قازان ايىندا جابىرلەنۋشى د. وزىنە سەنىم ارتاتىنىن بىلە وتىرىپ، قۇجاتتارىن جۇمىس بابىمەن دەگەن جەلەۋمەن سۇراتقان.

جابىرلەنۋشىنىڭ جەكە باسىن كۋالاندىراتىن قۇجاتتاردى العان سوڭ، س. ميكروقارجىلىق ۇيىمنان 600 مىڭ تەڭگەگە جۋىق تاۋارلى كرەديتتى جاسىرىن رەسىمدەپ، تاۋاردى ساتىپ، ءوز پايداسىنا جاراتقان.

بۇدان سوڭ س. جابىرلەنۋشىنى د- نى تولىق جاۋىپ تاستايمىن دەپ الداپ، ميكروقارجىلىق ۇيىمنان 560 مىڭ تەڭگە نەسيە الدىرتقان.

قولىندا د- نىڭ جەكە باس مالىمەتتەرىنىڭ پايدالانعان سوتتالۋشى، ءارتۇرلى ميكروقارجىلىق ۇيىمداردان جاسىرىن تۇردە قوسىمشا بايلانىس رەتىندە ءوزىنىڭ ۇيالى ءنومىرىن كورسەتە وتىرىپ، د- نىڭ اتىنان ميكرونەسيەلەر الىپ، جالپى 2 ميلليون تەڭگەدەن استام شىعىن كەلتىرگەن.

بۇدان بولەك، سوتتالۋشى س. وسىعان ۇقساس جاعدايلاردا جانە ءارتۇرلى جەلەۋمەن 15 ستۋدەنت پەن جاتاقحانا قىزمەتكەرلەرىنە الاياقتىق جاساپ، 22 ميلليون تەڭگەدەن استام شىعىنعا ۇشىراتقان.

سوت جارىسسوزىندە پروكۋرور سوتتالۋشى س- نى كىنالى دەپ تانىپ، وعان 4 جىل مەرزىمگە باس بوستاندىعىن شەكتەۋ جازاسىن تاعايىنداپ، بۇكىل مەرزىمگە پروباتسيالىق باقىلاۋ ورناتۋدى سۇرادى.

سوتتالۋشى س. تاعىلعان ايىپتى مويىنداپ، شىن نيەتپەن وكىنىپ، وزىنە باس بوستاندىعىنان ايىرمايتىن جازا تاعايىنداۋدى سۇرادى.

جابىرلەنۋشىلەر سوتتالۋشىنى كەشىردى.

ق ك 190-بابى 3-بولىگىنىڭ 4-تارماعىنىڭ سانكسياسىندا - مۇلكى تاركىلەنىپ، بەلگىلى بىر لاۋازىمداردى اتقارۋ نەمەسە بەلگىلى بىر قىزمەتپەن اينالىسۋ قۇقىعىنان التى جىلعا دەيىنگى مەرزىمگە ايىرا وتىرىپ نەمەسە ونسىز، ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ كوزدەلگەن.

سوت ۇكىمىمەن س. كىنالى دەپ تانىلىپ، 4 جىل مەرزىمگە باس بوستاندىعىن شەكتەۋ جازاسى تاعايىندالدى، سول ارالىقتا ول پروباتسيالىق باقىلاۋدا بولادى.

سوت ۇكىمى زاڭدى كۇشىنە ەنگەن جوق.

ەسكە سالا كەتەيىك، ءبىز بىلتىر ستۋدەنتتەردىڭ اتىنان نەسيە العان كومەندانت ۇستالعانىن حابارلاعان ەدىك.