مەكتەپ قاۋىپسىزدىگىنە بەيجاي قاراعان 24 باسشى ايىپپۇل ارقالادى

استانا. قازاقپارات - بالالاردىڭ قاۋىپسىزدىگىن قامتۋدا مەكتەپتەردى ءتيىستى قۇرال-جابدىقپەن قامتۋ جۇمىسىنا سالعىرت قاراعان باسشىلار جاۋاپقا تارتىلدى.

بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ مينيسترلىك مۇددەلى مەملەكەتتىك ورگاندارمەن بىرلەسىپ، بالالاردىڭ قاۋىپسىزدىگىن قامتاماسىز ەتۋ بويىنشا شارالار قابىلداۋدا. 27- تامىز بەن 30- قىركۇيەك ارالىعىندا «نازار اۋدار - بالالار!» اتتى جەدەل-پروفيلاكتيكالىق ءىس-شاراسى وتكىزىلەدى. ماقسات - جول قاۋىپسىزدىگى ەرەجەلەرىن ءتۇسىندىرۋ، بالالاردىڭ جاراقات الۋىن ازايتۋ جانە جول ءجۇرۋ ەرەجەلەرىن ساقتاۋ ساۋاتىن ارتتىرۋ. العاشقى 3 كۇندە مەكتەپتەر ورنالاسقان جەرلەردەگى جول بەلگىلەرى مەن باعدارشامداردىڭ جۇمىسى تەكسەرىلەدى. سونداي-اق بالالاردى تاسىمالدايتىن اۆتوبۋستاردىڭ ليتسەنزياسىنىڭ بار-جوعى قارالادى»، - دەدى مارات قوجايەۆ ۇكىمەت وتىرىسىندا.

سونىمەن قاتار اكسيا اياسىندا ىشكى ىستەر ورگاندارىنىڭ باسشىلارى مەكتەپتەردە قاۋىپسىزدىك نەگىزدەرى بويىنشا ءدارىس وتكىزەدى.

«ىشكى ىستەر ورگاندارى 5620 مەكەمەنىڭ قاۋىپسىزدىك جۇيەلەرىمەن جابدىقتالۋىن تەكسەردى. ناتيجەسىندە 2900 وبەكتىدە زاڭبۇزۋشىلىق انىقتالدى. اتاپ ايتقاندا، بەينەباقىلاۋ جۇيەلەرىنىڭ ستاندارتتارعا سايكەس كەلمەۋى، دابىل تۇيمەلەرىنىڭ جوقتىعى، تۋرنيكەتتەر مەن ليتسەنزيالانعان كۇزەتتىڭ بولماۋى. بارلىعى 24 باسشى جاۋاپقا تارتىلىپ، ولارعا 5,4 ميلليون تەڭگە ايىپپۇل سالىندى. قالعاندارىنا كەمشىلىكتەردى جويۋ تۋرالى ۇيعارىم بەرىلدى»، - دەيدى ول.

ونىڭ ايتۋىنشا، مەكتەپتەردە قاۋىپسىزدىكتى قامتۋعا قاتىستى تەكسەرىستەر جالعاسىپ جاتىر.