جاپونيادا ەمحاناداعى 24 ادامنىڭ ءومىرىن قيعان ءورت قاساقانا جاسالعان
تەرگەۋ بارىسىندا بەينەباقىلاۋ كامەرالارىنان كانيسترى بار ەر ادامنىڭ ۆەلوسيپەدپەن كەتىپ بارا جاتقان ۆيدەوجازباسى تابىلعان. سونىمەن قاتار، وساكا قالاسىنىڭ ورتالىعىنا جاقىن ورنالاسقان نيسيەدوگاۆا اۋدانىنداعى جانارماي قۇيۋ بەكەتى كۇدىكتىنىڭ جەكە باسىن كۋالاندىراتىن قۇجاتتى كورسەتىپ، ولاردان شىنىمەن جانارماي ساتىپ العانىن راستادى. ءورت 17-جەلتوقساندا قالانىڭ باس تەمىرجول ۆوكزالىنىڭ جانىنداعى ادام كوپ جۇرەتىن ورامداعى كەڭسە عيماراتتارىنىڭ ءبىرىنىڭ ءتورتىنشى قاباتىندا بولدى. ەمحانا سول جەردە ورنالاسقان، ول تۇرعان عيمارات تولىعىمەن جانىپ كەتتى.
قولدا بار اقپاراتقا سايكەس، ءورت وشاعى ليفت پەن كىرەبەرىس ەسىكتىڭ جانىندا بولعان، سونىڭ سالدارىنان ىشىندەگى ادامدار شىعا المادى. سوڭعى مالىمەتتەر بويىنشا، ءورت سالدارىنان كەم دەگەندە 24 ادام قازا تاپتى، تاعى ءتورت ادام، ونىڭ ىشىندە ءورت قويۋعا كۇدىكتى 60 جاستاعى ەر ادام جاراقات الىپ، اۋرۋحانادا جاتىر.
2019 -جىلى Kyoto Animation انيماتسيالىق كومپانياسىنىڭ ستۋدياسىن ورتەگەن ادام دا جانارماي قۇيۋ بەكەتىنەن جانارماي ساتىپ العان. وسىدان كەيىن جاپونيادا زاڭناما قاتايتىلدى، ەندى جەكە باسىن كۋالاندىراتىن قۇجاتتاردى كورسەتكەننەن كەيىن عانا كانيسترمەن بەنزين ساتىپ الۋعا بولادى.
