ەردوعان رەسەيلىك س ۋ-24 ۇشاعىنا شابۋىلدىڭ نەلىكتەن جاسالعانىن ءتۇسىندىردى

استانا. قازاقپارات -  تۇركيا پرەزيدەنتى تايىپ ەردوعان تۇرىك اسكەريلەرىنىڭ رەسەيلىك سۋ-24 ۇشاعىن نەلىكتەن اتىپ تۇسىرگەنىن ءتۇسىندىردى. ەردوعاننىڭ ايتۋىنشا، تۇركيانىڭ اسكەري اۋە كۇشتەرى قاتەرگە بايلانىستى شارالار ەرەجەسىنىڭ اياسىندا ارەكەت ەتكەن.

 بۇل تۋرالى ر ي ا نوۆوستي حابارلادى.

«ءبىز بۇل جاعدايدى قالامادىق، ءبىراق تۇركيانىڭ ءوز شەكاراسىن قورعاۋىنا دەگەن قۇقىعىن بارلىعى قۇرمەتتەۋى كەرەك. بەلگىسىز اسكەري نىسان ءبىزدىڭ اۋە كەڭىستىگىمىزگە كىرىپ كەتتى، بەس مينۋتتىڭ ىشىندە وعان ون ەسكەرتۋ جاسالدى، ءبىراق ولار تىڭدامادى. ءبىز قاتەرلەرگە قاتىستى ارەكەت ەتۋدىڭ ەرتەدە جاريا ەتىپ، قابىلداعان ەرەجە بويىنشا قاتاڭ تۇردە ارەكەت ەتۋگە شەشىم قابىلدادىق»، - دەپ مالىمدەدى ەردوعان تۇركيادا قاۋىپسىزدىك كەڭەسىنىڭ وتىرىسىندا.

 تۇرىك پرەزيدەنتى ءوز ەلىنىڭ اۆياتسيا شابۋىلىنان بەيبىت تۇرعىندارى تۇركيامەن شەكاراعا قاراي ىعىسۋعا ءماجبۇر بولعان سيريالىق تۇركمەندەرگە جاسالعان شابۋىلدى ايىپتايتىنىن ايتتى. ەردوعاننىڭ ايتۋىنشا، تۇركيانىڭ قايسىبىر ەلگە قاتىستى قانداي دا ءبىر جاۋگەرشىلىك نيەتتە ەمەس ەكەندىگىن قوستى.

 تۇركيانىڭ ءسوزىن ناتو باس حاتشىسى يەنس ستولتەنبەرگ تە قولداپ وتىر. ناتو كەڭەسىنىڭ شۇعىل وتىرىسىنان كەيىن سەيسەنبى كۇنى كەشتە ستولتەنبەرگ رەسەيلىك ۇشاققا قاتىستى وقيعادا ناتو- نىڭ باسقا دا وداقتاستارىنىڭ مالىمەتىنىڭ تۇركيانىڭ مالىمەتتەرىمەن سايكەس كەلەتىنىن مالىمدەدى.

 «مەن ماسەلەنىڭ ءمان- جايىنا بارمايمىن. ءبىراق مەن وداقتاس ەلدەردەن العان باعالاۋدىڭ بۇعان دەيىن تۇركيانىڭ كەلتىرگەن مالىمەتىمەن سايكەس كەلەتىنىن مالىمدەي الامىن»، - دەدى باس حاتشى. الايدا ستولتەنبەرگ اليانستىڭ س ۋ-24 ۇشاعىنىڭ قالاي قۇلاتىلعانى جايلى مالىمەتىن اشىپ ايتپادى.

 ايتا كەتەيىك، تۇركيا س ءى م وسى وقيعادان بىرنەشە كۇش بۇرىن ماسكەۋدى سيريا- تۇركيا شەكاراسىندا اسكەري وپەراتسيالاردى دوعارۋىن سۇراعان بولاتىن. ۆەدومستۆو رەسەيدىڭ انكاراداعى ەلشىسىن شاقىرىپ، ءجيى جاسالاتىن اۋە سوققىلارىنا قاتىستى نارازىلىق تانىتقان ەدى.

 ەسكە سالا كەتەيىك، تۇركيانىڭ اۋە كۇشتەرى سيريامەن شەكارالاس ايماقتا بەلگىسىز اسكەري ۇشاقتى اتىپ تۇسىرگەن بولاتىن. كەيىن ونىڭ رەسەيلىك س ۋ-24 ەكەنى انىقتالدى.

ءوز كەزەگىندە رەسەي پرەزيدەنتى ۆلاديمير پۋتين تۇركيا اسكەري اۋە كۇشتەرىنىڭ رەسەيلىك سۋ-24 ۇشاعىن اتىپ ءتۇسىرۋى جايلى وقيعانى لاڭكەستەرگە دەم بەرۋشىلەردىڭ رەسەيگە قاپىدا جاساعان سوققىسى دەپ باعالادى. «رەسەيلىك ۇشاقپەن بولعان قايعىلى وقيعانىڭ سالدارى ماسكەۋ مەن انكارانىڭ قارىم- قاتىناسىنا ايتارلىقتاي سىزات تۇسىرەدى»، - دەپ مالىمدەدى پۋتين.

ونىڭ ايتۋىنشا، رەسەي بولعان وقيعانى ساراپتايدى. "بۇل وقيعا لاڭكەستىكپەن ادەتكى كۇرەستىڭ اياسىنان شىعىپ كەتتى. ارينە، ءبىزدىڭ اسكەريلەر ءوزىن دە، ءوز ومىرلەرىن دە اياماي تەررورمەن باتىل كۇرەس جۇرگىزىپ جاتىر. ءبىراق بۇگىنگى جاعداي لاڭكەستەرگە استىرتىن دەم بەرۋشىلەردىڭ بىزگە تۇتقيىلدان جاساعان سوققىسى. بۇگىن بولعان وقيعاعا باسقاشا باعا بەرە المايمىن"، - دەدى پۋتين.

 ونىڭ پىكىرىنشە، رەسەي حالىقارالىق قاۋىمداستىقتىڭ ورتاق زۇلىم - تەرروريزممەن كۇرەستە بىرىگۋگە جول تابا بىلەدى دەپ ۇمىتتەنەدى. "رەسەي تۇركياعا كورشى ەل عانا ەمەس، دوس ەل دەپ تە قاراپ كەلدى. مۇنىڭ كىمگە كەرەك بولعانىن بىلمەيمىن، ءبىراق بىزگە كەرەك ەمەس ەدى. وقيعادان كەيىن تۇركيا دەرەۋ رف- مەن بايلانىس ورناتۋدىڭ ورنىنا ناتو- مەن بايلانىستى، قۇددى ءبىر ولاردىڭ ۇشاعىن رەسەي اتىپ تۇسىرگەندەي"، - دەدى پۋتين. سونىمەن بىرگە، رف پرەزيدەنتى رەسەيدىڭ تۇركيا تەرريتورياسىندا ي م باقىلاۋىنداعى كەن ورىندارىندا مۇنايدىڭ كوپ ەكەنىن ەرتەدە تىركەپ قويعانىن اتاپ ءوتتى.

 وسى ۋاقىتتا رەسەيدىڭ قورعانىس مينيسترلىگى Facebook جەلىسىندەگى پاراقشاسىندا تۇركيانىڭ اسكەري اۋە كۇشتەرى اتىپ تۇسىرگەن رەسەيلىك س ۋ-24 ۇشاعىنا قاتىستى جاڭا دەرەكتەردى جاريا ەتتى. «رەسەيدىڭ سۋ-24 اسكەري ۇشاعىن «حمەيميم» اۋە بازاسىنا ورالۋى كەزىندە سيريا اراب رەسپۋبليكاسىنىڭ تەرريتورياسىندا تۇرىكتىڭ F-16 جويعىش ۇشاعى اتىپ تۇسىرگەن. وبەكتيۆتى باقىلاۋ مالىمەتتەرىنىڭ ساراپتاماسى تۇركيانىڭ اۋە كەڭىستىگىنىڭ بۇزىلماعانىن ءبىرىڭعاي كورسەتىپ بەردى»، - دەلىنگەن ۆەدومستۆو حابارلاماسىندا.

**

رەسەي تۇركيا سيريامەن شەكارادا اتىپ تۇسىرگەن رەسەيلىك س ۋ-24 جويعىش ۇشاعىنىڭ ەكى ۇشقىشىن ىزدەۋ وپەراتسياسىن جۇرگىزىپ جاتقان م ي-8 تىكۇشاعى دا اپاتقا ۇشىراعانىن حابارلادى.

رەسەي قورعانىس مينيسترلىگىنىڭ مالىمەتىنشە، ۇشقىشتاردى ىزدەنۋگە قاتىسىپ جۇرگەن ەكى م ي-8 تىكۇشاعىنىڭ ءبىرىن مينومەتپەن اتقىلاعان. اپاتتان تىكۇشاق ەجكيپاجىنىڭ ءبىر ۇشقىشى قازا تاۋىپ، ەكىنشىسى امان قالعان.

بۇدان بۇرىن Syrian Observatory for Human Rights قۇقىق قورعاۋ ۇيىمى سيريانىڭ سولتۇستىگىندەگى ۇكىمەت اسكەرى باقىلايتىن ايماقتا رەسەيدىڭ اسكەري تىكۇشاعى كوتەرىلىسشىلەردىڭ تانككە قارسى قولدانىلاتىن زىمىرانىنان اتقىلانىپ، قونۋعا ءماجبۇر بولعانىن حابارلاعان.

ۇيىم تىكۇشاق لاتاكيا پروۆينتسياسىندا قونۋعا ءماجبۇر بولعانىن جانە ەكيپاجدىڭ امان قالۋعا مۇمكىندىگى بولعانىن، ءبىراق كوتەرىلىسشىلەر تىكۇشاق قونا سالىسىمەن تاعى دا زىمىرانمەن اتىپ جويىپ جىبەرگەنىن ايتادى.

http://kaz.tengrinews.kz