بيىل ۇلتتىق بانك 24 توننا التىن ساتىپ الدى
«بىلتىر قازاقستاندا شامامەن 46 توننا وڭدەلمەگەن التىن ءوندىرىلدى. 27,5 توننا اففينيرلەنگەن التىن الدىق. تەك سەگىز تونناعا جۋىق التىن كەنى رەسەيگە وڭدەۋگە جىبەرىلدى. ال اعىمداعى جىلى تەك ءتورت توننا التىن عانا رەسەيگە وڭدەۋگە جونەلتىلدى. ال زاڭ جوباسى كۇشىنە ەنسە، بۇل التىن كەندەرى دە تولىق قازاقستاندا وڭدەلەدى»، - دەدى زاڭ جوباسى بويىنشا بايانداعان مينيستر اسەت يسەكەشيەۆ.
قۇجاتتى تالقىلاۋ بارىسىندا دەپۋتات ومارحان وكسىكبايەۆ قازاقستاننىڭ التىن قورىنىڭ جەتپىس پايىزىنا دەيىن شەتەلدىك بانكتەردە جاتقانىن ايتىپ، ونى قايتارۋ ماسەلەسىن كوتەرگەن بولاتىن. وسىعان بايلانىستى ۇلتتىق بانك وكىلى مالىمەت بەرىپ ءوتتى.
«بۇگىنگى كۇنى ۇلتتىق بانكتە 115 توننا التىن بار. بانككە التىندى ساتىپ الۋ باسىمدىعى بەرىلگەنى بەلگىلى. وسىعان وراي، اعىمداعى جىلى ۇلتتىق بانك 24 توننا التىن ساتىپ الدى. 2014 - جىلى 24,6 توننا 2013 - جىلى 22 توننا ساتىپ الىندى. ياعني، التىننىڭ نەگىزگى بولىگى التىن ۆاليۋتالىق رەزەرۆتەردەن قۇرالىپ وتىر. ونداي رەزەرۆتەر بەلگىلى ءبىر تابىستار اكەلۋدە»، - دەدى ۇلتتىق بانك ءتوراعاسىنىڭ ورىنباسارى دينا عاليەۆا.
اۆتور: قانات مامەتقازى ۇلى
