«ديكي ارمان» 24 ادامدى Ritz Carlton مەن قازاقستان قوناقۇيلەرىنىڭ پاركينگتەرىندە ۇستاعان
بۇل تۋرالى ق ر باس پروكۋراتۋراسى 1-قىزمەت باستىعى سەرىك شالابايەۆ ايتتى، دەپ حابارلايدى قازاقپارات ءتىلشىسى. ورتالىق كوممۋنيكاتسيالار قىزمەتىندەگى بريفينگ بارىسىندا ول قىلمىستىق ورتاداعى تۇلعالاردىڭ قاڭتار وقيعاسىنا بەلسەنە قاتىسقانى بەلگىلى ەكەندىگىن ايتتى.
«قىلمىستىق ورتادا كەڭىنەن تانىمال «ديكي ارمان» لاقاپ اتتى جۇماكەلديەۆ پەن ونىڭ سىبايلاستارىنىڭ ءرولى ەرەكشە. اتاپ ايتقاندا، 6-قاڭتاردا ونىڭ قىلمىستىق توبىنا قاتىسۋشىلاردىڭ بىرىمەن الماتى قالاسىنداعى «قازاقستان» قوناقۇيىنە كەلگەن قىلمىسكەرلەرگە «Glock» جانە «ماكاروۆ» ماركالى تاپانشالار تاراتىلدى. وسى ۋاقىتتا قارۋلانعان قىلمىسكەرلەر ۇيىمداستىرۋشى مەن ونىڭ قاراماعىنداعى ادامداردان ءتيىستى نۇسقاۋلار الدى. ولار سەرىكتەستەرىن 10 ادامنان تۇراتىن توپتارعا ءبولىپ، جوسپارلانعان قىلمىستارىنداعى رولدەرىن انىقتادى. ىشتەرىنەن «باسشىلارى» تاعايىندالىپ، ولارعا برونەجيلەتتەر، باستارىنا ارنالعان قورعانىس قۇرالدارى، اتىس قارۋى جانە 200 مىڭ تەڭگە اقشا بەرىلدى»، - دەدى ول.
1-قىزمەت باستىعىنىڭ اتاپ وتۋىنشە، ونىڭ قاتارداعى سەرىكتەستەرىنە سۋىق قارۋلارىمەن، دۋبينكا جانە دەنەگە زيان كەلتىرۋگە بولاتىن باسقا زاتتارمەن قارۋلانۋ تاپسىرىلعان. ەرەكشە بەلگى رەتىندە بارلىق قاتىسۋشىلاردىڭ سىرت كيىمىنىڭ جەڭىنە اق ماتا تاققان.
«اتالعان قارۋلى قىلمىسكەرلەر توپتارى قالانىڭ ءارتۇرلى نۇكتەلەرىنەن 24 ازاماتتى ۇرلاپ، ولاردى ۇرىپ- سوعىپ، «Ritz Carlton» جانە «قازاقستان» قوناقۇيلەرىنىڭ پاركينگتەرىندە ۇستاعان. كەيىننەن، جابىرلەنۋشىلەر قالا شەتىنە جەتكىزىلىپ، قىلمىسكەرلەردىڭ قارۋلى كۇزەتى قويىلا وتىرىپ، مەتالل كونتەينەرگە ورنالاستىرىلدى. دەنە جاراقاتىن كەلتىرۋ ناتيجەسىندە جابىرلەنۋشىلەردىڭ ءبىرى قايتىس بولدى. كورسەتىلگەن قىلمىستاردى جاساعانى ءۇشىن 40 كۇدىكتى تۇلعا قاماۋعا الىندى. قالعان قىلمىستىق توپ قاتىسۋشىلارىن انىقتاۋ بويىنشا جۇمىستار جالعاسۋدا»، - دەدى سەرىك شالابايەۆ.
