قۇلسارى قالاسىنداعى توپتىق توبەلەس: 23 ادام ۇستالدى

اتىراۋ. قازاقپارات - اتىراۋدىڭ قۇلسارى قالاسىندا توپتىق توبەلەسكە قاتىسى بار دەگەن كۇدىكپەن 23 ادام ۇستالدى. ونىڭ ىشىندە 8 جاس ءوسپىرىم بار، دەپ حابارلايدى قازاقپارات ءتىلشىسى.

5-قىركۇيەك كۇنى جىلىوي اۋدانىنىڭ ورتالىعى - قۇلسارى قالاسىندا جاستار توپتاسىپ توبەلەسكەن. بۇل تۋرالى ۆيدەو الەۋمەتتىك جەلىدە تارادى.

«تاعى دا قۇلسارى. جاۋ كەلگەندەي ەلدىڭ بەرەكەتىن الىپ جۇرگەن جاستار. ۆيدەوعا ءتۇسىرىپ وتىرعان جاستار كوپقاباتتى ءۇيدىڭ توبەسىندە وتىرعان سياقتى. ءبىزدىڭ ءتارتىپ ساقشىلار قايدا؟»، - دەپ جازبا قالدىردى الەۋمەتتىك جەلى قولدانۋشىسى.

قۇلسارى قالاسىندا توبەلەستىڭ بولعانىن اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتى راستادى.

«كەشە، 5-قىركۇيەكتە تۇنگى ساعات 22:20 شاماسىندا قۇلسارى قالاسىنداعى كوپقاباتتى ءۇيدىڭ جانىندا ءبىر توپ ادامنىڭ توبەلەسكەنى انىقتالدى. جەرگىلىكتى پوليتسەيلەردىڭ جەدەل ارەكەتى ناتيجەسىندە بارلىق قاتىسۋشى ۇستالدى. اۋداندىق پوليتسيا بولىمىنە توبەلەسكە قاتىسى بار 23 ادام جەتكىزىلدى. ونىڭ ىشىندە 8 جاس ءوسپىرىم بار.

تەرگەۋ باستالدى. توبەلەستەن دەنە جاراقاتىن العاندار مەن اۋرۋحاناعا جەتكىزىلگەن جابىرلەنۋشىلەر جوق»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

ەسكە سالايىق، قۇلسارى قالاسىندا بىرەر كۇن بۇرىن عانا توبەلەس بولىپ، ءۇش كۇدىكتى قاماۋعا الىنعان بولاتىن. ول كەزدە 19-20 جاستاعى جىگىتتەر تۇنگى ساعات 03:00 شاماسىندا جينالىپ، توبەلەسكەن ەدى.