قازاقستان قۇرىلىس ماتەريالدارىنىڭ يمپورتىن 23 پايىزعا ازايتادى
«بۇگىنگى تاڭدا تۇرعىن جانە وندىرىستىك عيماراتتاردى، الەۋمەتتىك نىسانداردى، ينفراقۇرىلىمداردى سالۋ كەزىندە نەگىزگى ماتەريالداردىڭ قۇرىلىس ونىمدەرىنە نارىقتىڭ سۇرانىسى 934 ميلليارد تەڭگەنى قۇرايدى. وتاندىق كاسىپورىندار 586 ميلليارد تەڭگەگە قۇرىلىس ماتەريالدارىن وندىرسە، 348 ميلليارد تەڭگەنىڭ ءونىمى (%37) يمپورتتالادى. نارىق سۇرانىسىن قامتاماسىز ەتۋ ءۇشىن 33 جاڭا جوبا ىسكە اسىرىلۋدا. ونىڭ ىشىندە 8 جوبا يمپورت الماستىرۋعا باعىتتالادى»، - دەدى بەيبىت اتامقۇلوۆ ۇكىمەت وتىرىسىندا.
ءمينيستردىڭ ايتۋىنشا، ول جوبالاردى ىسكە اسىرۋ ناتيجەسىندە يمپورت ۇلەسىن 15 پايىزعا تومەندەتىپ، تۇرعىن ءۇي قۇرىلىسىندا وتاندىق ونىمدەر قولدانىسىن %90 پايىزعا ارتتىرۋ جوسپارلانىپ وتىر.
«قازىرگى ۋاقىتتا نىسانداردى سالۋ كەزىندە قۇرىلىس ماتەريالدارىنىڭ 11 ءتۇرى جوعارى سۇرانىسقا يە. ولار: شىنى، پوليەتيلەن قۇبىرلارى، قۇرعاق قۇرىلىس قوسپالارى، ارماتۋرا، كەراميكالىق تاقتايشا، جىلۋ وقشاۋلاعىش ماتەريالدار، كەراميكالىق وتقا ءتوزىمدى كىرپىشتەر، سانفايانس، تۇسقاعاز، شاتىر ماتەريالدارى، لاك- بوياۋ بۇيىمدارى. ارينە ەلدە بۇل قۇرىلىس ماتەريالدارىنىڭ كوپشىلىگى وندىرىلەدى. ءبىراق نارىقتىڭ قاجەتتىلىگىن تولىقتاي جابا المايدى. بيىل ءبىز قۇرىلىس ماتەريالدارىنىڭ 5 ءتۇرىن، اتاپ ايتقاندا شىنى، پوليەتيلەن قۇبىرلارى، قۇرعاق قۇرىلىس قوسپالارى، ارماتۋرا، كەراميكالىق تاقتايشانى ءوندىرۋ بويىنشا يمپورت الماستىراتىن 8 جوبانى ىسكە قوسۋدى جوسپارلاپ وتىرمىز. ولاردىڭ ءوندىرىس كولەمى - 103 ميلليارد تەڭگە. بۇل جوبالار ىشكى نارىقتاعى يمپورت ۇلەسىن %15 عا تومەندەتەدى»، - دەدى ول.
سونداي-اق، جىلۋ وقشاۋلاعىش ماتەريالدار، كەراميكالىق وتقا ءتوزىمدى كىرپىش، سانفايانس وندىرەتىن جوبالاردى ىسكە اسىرۋ كوزدەلۋدە. ولاردىڭ ءوندىرىس كولەمى 61 ميلليارد تەڭگە بولادى. بۇل قۇرىلىس ماتەريالدارىنىڭ وسى تۇرلەرى بويىنشا يمپورت ۇلەسىن %8 پايىزعا ازايتۋعا مۇمكىندىك بەرەدى.
«وسىلايشا قۇرىلىس ماتەريالدارىنىڭ نەگىزگى تۇرلەرى بويىنشا جوسپارلانعان بارلىق جوبالاردى ىسكە اسىرۋ ناتيجەسىندە يمپورتتى %23 عا ازايتامىز»، - دەيدى بەيبىت اتامقۇلوۆ.
