قازاقپارات كۇنتىزبەسى: 23- ماۋسىم
اتاۋلى كۇندەر
قازاقستان پوليتسياسى كۇنى
1992-جىلى 23- ماۋسىمدا ق ر جوعارعى كەڭەسى «قازاقستان رەسپۋبليكاسىنىڭ ىشكى ىستەر ورگاندارى تۋرالى» زاڭدى قابىلدادى. بۇل، قازاقستان پوليتسياسىنىڭ قىزمەتى مەن مىندەتىن ايقىنداعان العاشقى قۇقىقتىق اكت بولدى.
2007-جىلعى 5- ماۋسىمدا ەلباسى نۇرسۇلتان نازاربايەۆتىڭ جارلىعىمەن 23- ماۋسىم پوليتسيا كۇنى بولىپ بەكىتىلدى.
قازاقستاندا مەملەكەتتىك قىزمەتشى كۇنى
2013-جىلى ق ر پرەزيدەنتى «قازاقستان رەسپۋبليكاسىنداعى كاسىبي جانە وزگە دە مەرەكەلەر تۋرالى» جارلىققا وزگەرىستەر ەنگىزىپ، كۇنتىزبەدە مەملەكەتتىك قىزمەتشى كۇنى كاسىبي مەرەكەسى پايدا بولدى. وسى كۇنى سونداي-اق ازەربايجان، قىرعىزستان مەن ۋكراينانىڭ مەملەكەتتىك قىزمەتشىلەرى مەرەكەلەرىن اتاپ وتەدى.
حالىقارالىق وليمپيادا كۇنى
بۇل مەرەكەنى اتاپ ءوتۋ باستاماسىن حالىقارالىق وليمپيادا كوميتەتى 1948-جىلى سانكت-موريتستە (شۆەيتساريا) وتكەن ءوزىنىڭ 42-سەسسياسى بارىسىندا ۇسىندى.
بۇل داتا كەزدەيسوق الىنعان جوق، 23- ماۋسىم - قازىرگى وليمپيادا قوزعالىسى قۇرىلعان كۇن رەتىندە ەسەپتەلەدى. 1894-جىلى ءدال وسى كۇنى سوربوننادا وتكەن كونگرەستە پەر دە كۋبەرتەننىڭ وليمپيادا ويىندارىن جانداندىرۋ باستاماسى قولداۋعا يە بولىپ، حالىقارالىق وليمپيادا كوميتەتى قۇرىلدى.
ب ۇ ۇ مەملەكەتتىك قىزمەت كۇنى
2003-جىلدىڭ ناۋرىز ايىندا ب ۇ ۇ باس اسسامبلەياسى 23- ماۋسىم كۇنىن بىرىككەن ۇلتتار ۇيىمىنىڭ مەملەكەتتىك قىزمەت كۇنى دەپ جاريا ەتكەن 57/277№ قاراردى قابىلدادى. ب ۇ ۇ بارلىق مۇشە مەملەكەتتەردى بۇل كۇنى مەملەكەتتىك قىزمەتتىڭ قوعامدى دامىتۋ پروتسەسىنە قوساتىن ۇلەسى مەن ءمانىن تانىتاتىن ارنايى ءىس-شارالار وتكىزىپ، مەملەكەتتىك قىزمەتكەرلەردى ماراپاتتاۋ راسىمدەرىن وتكىزۋدى، سونداي-اق جاستاردىڭ مەملەكەتتىك قىزمەتكەر مانسابى تۋرالى شەشىم قابىلداۋ باعىتىندا قىزىعۋشىلىعىن وياتۋعا شاقىردى.
ەستە قالار وقيعالار
1993-جىلى ق ر پرەزيدەنتى ن. ءا. نازاربايەۆتىڭ وكىمىمەن الماتى شەت تىلدەرى پەداگوگيكالىق ينستيتۋتى قازاق مەملەكەتتىك الەم تىلدەرى ۋنيۆەرسيتەتى بولىپ قايتا قۇرىلدى. (قازىرگى «ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى» ا ق).
1995-جىلى «قازپوچتا» ا ق «قازاقستان سۋرەت ونەرى» تاقىرىبىندا ماركالار سەرياسىن شىعاردى. ماركالاردا سۋرەتشىلەر ءا. قاستەيەۆ، س. مامبەيەۆ، ج. شاردەنوۆ، گ. يسمايلوۆا جانە ك. تەلجانوۆتىڭ تۋىندىلارى بەينەلەنگەن.
2010-جىلى يوردانيانىڭ استاناسى اممان قالاسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ەسىمىمەن اتالعان كوشەنىڭ سالتاناتتى اشىلۋ ءراسىمى ءوتتى. شارا يوردان فولكلورلىق ءانسامبلىنىڭ ونەر كورسەتۋىمەن باستالدى.
اممان قالاسىنىڭ مەرى مەن استانا قالاسىنىڭ اكىمى سالتاناتتى جاعدايدا ن. نازاربايەۆتىڭ ەسىمى جازىلعان تاقتايشانىڭ شىمىلدىعىن اشتى.
2010-جىلى دۋشانبەدە تاجىك تىلىنە اۋدارىلعان ابايدىڭ «قارا سوزدەرى» «پاندنوما» دەپ اتالاتىن كىتاپ بولىپ باسىلىپ شىعىپ، تاجىكستان جۋرناليستەرى وداعىندا تۇساۋى كەسىلدى. بۇل - قازاقستان رەسپۋبليكاسى ەلشىلىگىنىڭ، تاجىكستان جۋرناليستەر وداعىنىڭ جانە «تاجىكستان- قازاقستان» دوستىق قوعامىنىڭ بىرلەسكەن جوباسى.
2013-جىلى نيۋ-يورك شتاتىنىڭ استاناسى ولباني قالاسىندا تۇركى حالىقتارى كۇنى مەرەكەلەندى. كەلۋشىلەر نازارىنا قازاقستان، ازەربايجان، قىرعىزستان جانە تۇركيا ەلدەرىنىڭ دامۋى جونىندە اقپارات ۇسىنىلدى.
2015-جىلى الماتىدا قازاقستانداعى العاشقى اۋتيزممەن اۋىراتىن بالالارعا ارنالعان ورتالىق اشىلدى. ورتالىقتا 40 ماماننان قۇرالعان ديستسيپليناارالىق كوماندا جۇمىس ىستەيدى.
2015-جىلىرف استراحان وبلىسىنداعى كالينينو اۋىلىنداعى مەكتەپكە قازاق عالىمى، اكادەميك ەرەجەپ مامبەتقازيەۆتىڭ اتى بەرىلدى. مۇنداي شەشىمگە اۋىل تۇرعىندارى ءبىراۋىزدان كەلگەن. حيميا عىلىمدارىنىڭ دوكتورى، عۇلاما عالىم ەرەجەپ مامبەتقازيەۆ وسى اۋىلداعى مەكتەپتىڭ تۇلەگى.
اكادەميك ەرەجەپ ءالحايىر ۇلى مامبەتقازيەۆ قازاقستاننىڭ تۇڭعىش ءبىلىم جانە عىلىم ءمينيسترى، ق ر جوعارعى كەڭەسىنىڭ 12 شاقىرىلىمىنىڭ دەپۋتاتى بولعان.
2016-جىلى مەحيكودا قازاقستان رەسپۋبليكاسىنىڭ مەكسيكا قۇراما شتاتتارىنداعى ەلشىلىگىنىڭ رەسمي يناۋگۋراتسياسى ءوتتى. وعان قازاق دياسپوراسىنىڭ وكىلدەرى، سىرتقى ساياسي ۆەدومستۆو باسشىلىعى، مەملەكەتتىك ورگانداردىڭ، پارلامەنتتىڭ، ديپلوماتيالىق كورپۋستىڭ وكىلدەرى، لاتىن امەريكاسىندا جانە كاريب باسسەينىندە يادرولىق قارۋدى تاراتپاۋ جونىندەگى اگەنتتىكتىڭ باسشىلىعى قاتىستى.
2018-جىلى پەتروپاۆلدا جەكە قاراجات ەسەبىنەن ۇلى اقىن ماعجان جۇمابايەۆقا ەسكەرتكىش ورناتىلدى. ەسكەرتكىشتىڭ اۆتورى اتاقتى قازاقستاندىق ءمۇسىنشى ەدىگە راحماديەۆ. ەسكەرتكىش قولادان جاسالعان، بيىكتىگى - 270 سانتيمەتر. تۇعىرى - گرانيت، بيىكتىگى - 200 سانتيمەتر.