بۇگىن 23- قىسقى وليمپيادا ويىندارى رەسمي تۇردە باستالادى
وليمپياداعا قازاقستاننان 49 سپورتشى 57 جولداما جەڭىپ العان بولاتىن. ولار سپورتتىڭ 9 تۇرىنەن سىنعا تۇسەدى. وليمپيادادا جالپى 15 سپورت تۇرىنەن 102 مەدال جيىنتىعى ساراپقا سالىنادى.
قازىرگى تاڭدا سپورتشىلارىمىز وليمپيادا قالاشىعىنا كەلىپ، ەڭ سوڭعى جاتتىعۋ جۇمىستارىن جۇرگىزىپ، وزدەرى سىنعا تۇسەتىن جارىس الاڭدارىمەن تانىسىپ ۇلگەردى.
وسى ورايدا، وسىعان دەيىنگى قازاقستان سپورتشىلارىنىڭ قىسقى وليمپياداداعى جەتىستىكتەرىن ەسكە تۇسىرە كەتەيىك.
قىسقى وليمپيادا ويىندارى تاريحىندا قازاقستان ءۇشىن العاشقى مەدالدى قوستانايلىق شاڭعىشى يۆان گارانين جەڭىپ العان بولاتىن. گارانين 1976 -جىلى ينسبرۋك قالاسىندا وتكەن XII وليمپيادا ويىندارىندا ەكى قولا مەدال جەڭىپ الدى. ال 1988 -جىلى كالگاريدە وتكەن XV وليمپيادا جارىستارىندا شاڭعىشىلار ۆلاديمير ساحانوۆ - كۇمىس، ۆلاديمير سميرنوۆ قوس كۇمىس پەن قولا مەدال الدى.
ال 1994 -جىلى وتكەن XVII قىسقى وليمپياداعا قازاقستان العاش رەت تاۋەلسىز مەملەكەت رەتىندە قاتىسىپ، قانجىعاسىنا 1 التىن، 2 كۇمىس مەدال سالعان بولاتىن. بۇل ءۇش مەدالدى دا شاڭعىشى ۆلاديمير سميرنوۆ جەڭىپ الدى. وسى جۇلدەلەردىڭ ارقاسىندا ەلىمىز جالپىكوماندالىق ەسەپتە 12-ورىنعا ورنالاستى.
مىنە، سول ۋاقىتتان بەرى قازاقستان سپورتشىلارى قىسقى وليمپيادا ويىندارىنان بىردە- ءبىر التىن جۇلدە الا الماي كەلەدى.
1998 -جىلى جاپونيانىڭ ناگانو قالاسىندا وتكەن XVІІІ قىسقى وليمپياداعا تاعى دا شاڭعىشى ۆلاديمير سميرنوۆ قاتىسىپ، «قولا» ەنشىلەدى. سونداي-اق كونكيمەن جۇگىرۋشى ليۋدميلا پروكاشيەۆاعا دا قولا مەدال بۇيىردى.
وكىنىشكە قاراي، 2002 -جىلى ا ق ش- تىڭ سولت- لەيك- سيتي قالاسىندا وتكەن XⅨجانە 2006 -جىلى يتاليانىڭ تۋرين قالاسىنداعى XХ ويىنداردا وتانداستارىمىزدىڭ ەشبىرى جەڭىس تۇعىرىنان كورىنە العان جوق.
ال 2010 -جىلى كانادانىڭ ۆانكۋۆەر قالاسىندا جالاۋى جەلبىرەگەن ХХІ قىسقى وليمپيادا ويىندارىندا قازاقستاندىق بياتلونشى ەلەنا حرۋستاليەۆا جەكەلەي سىندا كۇمىس مەدالدى جەڭىپ الدى.
2014 -جىلى رەسەيدىڭ سوچي قالاسىندا وتكەن سوڭعى قىسقى ويىنداردا مانەرلەپ سىرعاناۋشى دەنيس تەن قوس باعدارلاما بويىنشا 255,1 ۇپاي جيناپ، قازاقستان قورجىنىنا قولا جۇلدەنى سالدى.
ەندى، پحەنچحان وليمپياداسىندا ەل قورجىنىنا كىمدەر مەدال سالاتىنى الداعى كۇندەرى بەلگىلى بولماق. بۇگىن استانا ۋاقىتىمەن 17:00-دە وليمپيادانىڭ رەسمي اشىلۋ سالتاناتى وتەدى. وندا قازاقستاننىڭ كوك بايراعىن شورت- ترەكشى ابزال اجىعاليەۆ كوتەرىپ شىعادى.
كۇنسۇلتان وتارباي
