سيريادا ءزىلزالادان قازا تاپقاندار سانى 237 ادامعا جەتتى
مالىمەتكە سايكەس، كەم دەگەندە 639 ادام زارداپ شەككەن. قازا تاپقاندار مەن زارداپ شەككەندەردىڭ كوپشىلىگى لاتاكيا، الەپپو، حاما جانە تارتۋس پروۆينتسيالارىندا تىركەلگەنى اتاپ ءوتىلدى. بۇعان دەيىن سيريالىق باق 111 ادام قازا تاپقانىن حابارلاعان بولاتىن.
سيريانىڭ داماسك باقىلاۋىنا الىنباعان اۋداندارىندا قۇرباندار، زارداپ شەككەندەر مەن قيراعان عيماراتتار تۋرالى اقپارات جوق.
ءوز كەزەگىندە، SANA اگەنتتىگىنىڭ حابارلاۋىنشا، رەسپۋبليكانىڭ قورعانىس مينيسترلىگى «جەر سىلكىنىسى سالدارىنان زارداپ شەككەن حالىققا جەدەل كومەك كورسەتۋ، ۇيىندىلەر استىندا قالعان ادامداردى ىزدەۋ جانە الىپ شىعۋ ءۇشىن ەلدىڭ بارلىق پروۆينتسيالارىنداعى قۇرامالارىن جانە [ۆەدومستۆولىق باعىنىستى] قۇرىلىمدارىن جۇمىلدىرۋدا».
اراب رەسپۋبليكاسى دەنساۋلىق ساقتاۋ ءمينيسترىنىڭ كومەكشىسى احمەد دۋمەيريا اتاپ وتكەندەي، «بۇل ءالى ناقتى سان ەمەس جانە قۇتقارۋ جۇمىستارى جالعاسقان سايىن قۇرباندار سانى ارتۋى ىقتيمال».
ءوز كەزەگىندە سيريانىڭ كولىك مينيسترلىگى ەلدىڭ سولتۇستىك ايماقتارىندا تەمىرجول بايلانىسىنىڭ توقتاتىلعانىن حابارلادى.
«جولدار مەن كوپىر قۇرىلىمدارىنىڭ ىقتيمال زاقىمدانۋىن ەسكەرە وتىرىپ، ساقتىق شاراسى رەتىندە پويىز قوزعالىسى توقتاتىلدى»، - دەلىنگەن ۆەدومستۆو مالىمدەمەسىندە.
Al Hadath مالىمەتىنشە، ونداعان ادام الەپپو، يدليب، لاتاكيا جانە حاما پروۆينتسيالارىندا قيراعان عيماراتتاردىڭ استىندا قالىپ قويعان. قۇتقارۋ جۇمىستارى قاتتى جاڭبىرعا قاراماستان جالعاسىپ جاتىر.
ەسكە سالايىق، تۇركيانىڭ وڭتۇستىك-شىعىسىندا 7,4 ماگنيتۋداسىنا دەيىن ءۇش رەت جەر سىلكىندى. 7,4 بالدىق ەڭ قۋاتتى جەراستى ءدۇمپۋى كاحرامانماراش پروۆينتسياسىنداعى پازاردجيك اۋدانىندا جەرگىلىكتى ۋاقىت بويىنشا 04:17 دە، 7 ك م تەرەڭدىكتە بولدى. سودان كەيىن ءارتۇرلى ايماقتاردا - ادانا، انكارا، انتاليا، گازيانتەپ، كايسەري، مەرسين، ترابزون، ۋرفادا جەر سىلكىنگەن.
قازا تاپقاندار مەن زارداپ شەككەندەر تۋرالى اقپارات تولىقتىرىلىپ جاتىر. سوڭعى مالىمەتكە سايكەس، قازا بولعاندار سانى 76 عا جەتتى، 440 ادام جاراقات الدى. قيراعان عيماراتتار سانى - 140.
بۇعان دەيىن تۇركياداعى جەر سىلكىنىسى سالدارىنان سيريادا قازا تاپقان 100 ادام تۋرالى جازعان ەدىك.