قازاقستان-چەحيا بيزنەس-فورۋمىندا 230 ميلليون ەۋروعا كەلىسىمدەر جاسالدى

قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.
ءىس-شاراعا ەكى ەل ۇكىمەتتەرىنىڭ باسشىلارى ءاليحان سمايىلوۆ پەن پەتر فيالا، مەملەكەتتىك سەكتوردىڭ، ۇلتتىق كومپانيالار مەن ىسكەر توپتاردىڭ وكىلدەرى قاتىستى. بيزنەس-فورۋم اياسىندا پلەنارلىق وتىرىس ءوتتى جانە B2B فورماتىندا ەكىجاقتى كەزدەسۋلەر بولدى.
ءاليحان سمايىلوۆ ءوز سوزىندە قازىرگى ۋاقىتتا رەسپۋبليكا اۋماعىندا 200 گە جۋىق بىرلەسكەن كاسىپورىن جۇمىس ىستەيتىنىن اتاپ ءوتتى.
«چەح بيزنەسىنىڭ قازاقستاندا بىرلەسكەن جوبالاردى ىسكە قوسۋعا قىزىعۋشىلىق تانىتۋى - ءبىزدىڭ ەلىمىزدەگى قولايلى ينۆەستيتسيالىق احۋالدىڭ شىنايى كورىنىسى. بىزدە سەرپىندى ينۆەستيتسيالىق جوبالاردى جۇزەگە اسىرۋ ءۇشىن بارلىق قاجەتتى العىشارتتار بار»، — دەدى ءاليحان سمايىلوۆ.
ول قازاقستان ينۆەستيتسيا تارتۋ بويىنشا ورتالىق ازيادا كوشباسشى بولىپ قالا بەرەتىنىن ەسكە سالدى. وسىلايشا، تاۋەلسىزدىك جىلدارىندا رەسپۋبليكا 410 ميلليارد دوللاردان استام تىكەلەي شەتەلدىك ينۆەستيتسيا تارتۋعا قول جەتكىزدى.
«ءبىزدىڭ ستراتەگيالىق مىندەتىمىز - 2029-جىلعا دەيىن تاعى 150 ميلليارد دوللار ينۆەستيتسيا تارتۋ. ەلىمىزدەگى ينۆەستورلار ءۇشىن سالىقتىق جەڭىلدىكتەر، كەدەندىك تولەمدەردەن بوساتۋ جانە ت. ب. ءتۇرلى مەملەكەتتىك قولداۋ شارالارى قاراستىرىلعان. ەكونوميكانىڭ باسىم سەكتورلارى ءۇشىن بولەك ارنايى ەكونوميكالىق جانە ونەركاسىپتىك ايماقتار بار. ولاردىڭ قاتىسۋشىلارى بارلىق قاجەتتى ينفراقۇرىلىم مەن جەڭىلدىكتەر پاكەتىن الادى»، — دەدى پرەمەر-مينيستر.
ۇكىمەت باسشىسى ينۆەستيتسيا تارتۋدىڭ ماڭىزدى الاڭىنا اينالعان، ءتيىستى قارجى قۇرالدارى مەن قىزمەتتەرىنىڭ تولىق جيىنتىعىنا يە «استانا» حالىقارالىق قارجى ورتالىعىنىڭ قىزمەتىن ەرەكشە اتاپ ءوتتى. ورتالىقتىڭ تابىستى جۇمىسىنىڭ دالەلى - وندا قازىردىڭ وزىندە الەمنىڭ 73 ەلىنەن 1800-دەن استام كومپانيا تىركەلگەن.
ءسوز سوڭىندا ءاليحان سمايىلوۆ استانادا ءوتىپ جاتقان بيزنەس-فورۋم قازاقستان مەن چەحيانىڭ ءوزارا ساۋدا-ەكونوميكالىق قارىم-قاتىناستارىن تەرەڭدەتۋگە تىڭ سەرپىن بەرەتىنىن اتاپ ءوتتى.
«ءبىزدىڭ فورۋم اياسىندا 230 ميلليون ەۋرو سوماسىنداعى ءبىرقاتار قۇجاتتارعا قول قويىلۋدا. سونىڭ نەگىزىندە ءتۇرلى بىرلەسكەن جوبالاردى جۇزەگە اسىرۋ جوسپارلانىپ وتىر. ءبىز چەحيالىق ارىپتەستەرمەن ينۆەستيتسيالىق ىنتىماقتاستىعىمىزدى ودان ءارى تەرەڭدەتۋگە دايىنبىز جانە نيەتتەمىز»، — دەپ تۇيىندەدى ءسوزىن پرەمەر-مينيستر.