قارقارالىنىڭ بۇرىنعى اكىمىنىڭ 23 جاستاعى ۇلى 10 جىلعا سوتتالدى
سۋديا قايرات قاسىموۆ ەكى سوتتالۋشىنى دا قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتى سانات حاسەنوۆكە قاستاندىق جاساۋعا ايىپتى دەپ تانىپ، ولاردىڭ ءارقايسىسىن 10 جىلعا باس بوستاندىعىنان ايىرۋعا جازا كەستى.
«سوتتالۋشىلاردىڭ كىسى ولتىرۋگە ارەكەتتەنۋدەگى كىناسى تولىق كولەمدە دالەلدەندى. سوت ولاردى قوعامنان وقشاۋلاۋ جاعدايىندا عانا تۇزەۋگە بولادى دەپ ەسەپتەيدى. بەلگىلەنگەن جازانى سوتتالۋشىلار قاتاڭ رەجيمدەگى كولونيادا وتەۋى كەرەك»، - دەدى سۋديا قاسىموۆ.
بۇعان دەيىن پروكۋرور سوتتالۋشىلاردىڭ ءارقايسىسىنا 11 جىل جازا سۇراعان بولاتىن.
ەسكە سالايىق، قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتى سانات حاسەنوۆ وتكەن جىلدىڭ 29 - قازانىندا سوققىعا جىعىلعان ەدى. ونى ءوزىنىڭ كۋرستاسى - قالا اكىمىنىڭ 23 جاستاعى ۇلى مەن ونىڭ 33 جاستاعى تانىسى ۇرىپ- سوققان. باسىنا دومكرات تيگەن جىگىت قارقارالى سىرتىنداعى ورماندا ەسىن جيىپ، بىرنەشە مەتر جەردە ءوزىنىڭ ۆاز اۆتوكولىگىنىڭ ورتەنىپ جاتقانىن كورەدى.
قالاعا قاراي جول تابۋى ءۇشىن ستۋدەنت سۇرلەۋمەن ءجۇرىپ كەلە جاتىپ، جولدان ءۇي-كۇيى جوق ادامنىڭ ءمايىتىن كورەدى، ايازدا ءۇسىپ قالماۋى ءۇشىن ونىڭ ۇستىندەگى كيىمدى الىپ كيەدى. ءسويتىپ، جولدان ءوتىپ بارا جاتقان كولىك يەلەرى ستۋدەنتتى اۋرۋحاناعا جەتكىزەدى. قارقارالى اۋداندىق كريمينالدىق پوليتسيا ءبولىمىنىڭ قىزمەتكەرلەرى كىسى ولتىرۋگە ارەكەتتەنگەنى جانە وزگەنىڭ مۇلكىن جويىپ جىبەرگەنى ءۇشىن كۇدىكتى رەتىندە اكىمنىڭ ۇلى مەن ونىڭ تانىسىن ۇستادى. ۇستالعاندار جىگىتتى ءولتىرىپ، ونى شەشىندىرگەنىن جانە جەكە مۇلىكتەرى مەن قۇجاتتارىن ورتەپ جىبەرگەنىن مويىندادى. ول كەزدە سوتتالۋشىلار قۇرباندارىنىڭ ءتىرى قالعانىن بىلگەن جوق.
قارقارالى اكىمى نۇرلان باتىربەكوۆ ۇلى تۇتقىندالعاننان كەيىن ءوز ەركىمەن قىزمەتتەن كەتتى. ونىڭ الدىندا شەنەۋنىكتىڭ ۇلى اتىس قارۋىن زاڭسىز ساقتاعانى ءۇشىن جاۋاپقا تارتىلعان. اكىمنىڭ ۇلىنىڭ تانىسى دا بۇرىن ادام دەنساۋلىعىنا قاساقانا زيان كەلتىرگەنى ءۇشىن قىلمىستىق جاۋاپكەرشىلىكتى وتكەرگەن.
