سەناتورلار 22- ماۋسىم كۇنى وتەتىن پالاتا وتىرىسىنىڭ كۇن ءتارتىبىن بەكىتتى
وندا دەپۋتاتتار 22- ماۋسىم كۇنى بولاتىن سەنات وتىرىسىنىڭ كۇن ءتارتىبىن بەكىتتى، دەپ حابارلايدى قازاقپارات.
سوعان سايكەس الداعى بەيسەنبىدە سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. وسى قۇجاتتىڭ نورمالارى ارقىلى سكۋتەر جۇرگىزۋشىلەرىنىڭ قۇقىقتارى مەن مىندەتتەرى بەلگىلەنەدى. سونداي-اق اتالعان كولىك قۇرالدارىن مەملەكەتتىك تىركەۋ تۋرالى كۋالىكتەردى دايىنداۋ سالاسىندا مەملەكەتتىك مونوپوليانى ەنگىزۋ كوزدەلگەن.
سونىمەن قاتار پالاتا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سۇيىتىلعان گاز اينالىمىن رەتتەۋ جانە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالادى. بۇل زاڭ سۇيىتىلعان گازدى تاراتۋ جۇيەسىنىڭ اشىقتىعىن قامتاماسىز ەتۋگە ارنالعان.
بيۋرو وتىرىسىندا سەنات ءتوراعاسى مەملەكەت باسشىسىنىڭ تاپسىرمالارىن ورىنداۋعا ارنالعان ءبىرقاتار ماڭىزدى زاڭنىڭ سەسسيا سوڭىنا دەيىن قابىلدانۋى كەرەك ەكەنىن ايتتى. ولاردىڭ قاتارىندا زاڭسىز الىنعان اكتيۆتەردى قايتارۋ، كاسىبي بىلىكتىلىك جانە ونلاين- پلاتفورمالار ماسەلەلەرىنە قاتىستى زاڭدار بار.
ودان بولەك كەلەسى سەسسياعا دايىندىق جۇمىستارىنىڭ ماڭىزدىلىعى تۋرالى دا ءسوز بولدى. وسىعان وراي ماۋلەن اشىمبايەۆ سەناتورلاردى ءتيىستى جۇمىستاردى ۋاقتىلى اتقارۋعا شاقىردى جانە پالاتانىڭ الداعى سەسسياعا ارنالعان جۇمىس جوسپارىنا ۇسىنىستار بەرۋدى تاپسىردى.
بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ كوميتەتتەرىنە ءبولىنىپ بەرىلدى.
