ق ر و س ك سايلاۋشىلاردىڭ داۋىس بەرۋگە قاتىسۋ بەلسەندىلىگى تۋرالى الدىن الا دەرەكتەردى 22:00 دە جاريا ەتەدى

استانا. قازاقپارات - 22:00 دە ق ر و س ك ءتوراعاسىنىڭ ورىنباسارى ۆلاديمير فووس سايلاۋعا سايلاۋشىلاردىڭ كەلۋى تۋرالى الدىن الا دەرەكتەردى جاريا ەتەدى. بۇل تۋرالى بۇگىن ق ر ورتالىق سايلاۋ كوميسسياسىندا وتكەن بريفينگتە ق ر و س ك حاتشىسى باقىت مەلدەشيەۆ ءمالىم ەتتى.

«كۇنى بويى ءبىز سىزدەردىڭ نازارلارىڭىزعا جالپى رەسپۋبليكا مەن وڭىرلەر بويىنشا سايلاۋشىلاردىڭ بەلسەندىلىگى مەن كەلۋى تۋرالى جەدەل دەرەكتەردى ۇسىنىپ وتىرامىز. سونداي-اق، باسپا ءسوز ورتالىعىندا ق ر سىرتقى ىستەر مينيسترلىگى جانە ىشكى ىستەر مينيسترلىگى مەن باس پروكۋراتۋرا وكىلدەرىنىڭ بريفينگتەرى وتەدى. ساعات 22.00 شاماسىندا ورتالىق سايلاۋ كوميسسياسى ءتوراعاسىنىڭ ورىنباسارى ۆ. فووستىڭ بريفينگى وتەدى. ونىڭ اياسىندا قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا سايلاۋشىلاردىڭ كەلۋى جونىندەگى الدىن الا دەرەكتەرى جاريالانادى»، - دەدى ب. مەلدەشيەۆ.

كوميسسيا حاتشىسىنىڭ ايتۋىنشا، ەلىمىز بويىنشا 9741 سايلاۋ ۋچاسكەسى بار.

«اقمولا وبلىسىندا 808, اقتوبە وبلىسىندا 521, الماتى وبلىسىندا 883, اتىراۋ وبلىسىندا 232, شىعىس قازاقستان وبلىسىندا 1079, جامبىل وبلىسىندا 461, باتىس قازاقستان وبلىسىندا 523, قاراعاندى وبلىسىندا 784,  قىزىلوردا وبلىسىندا 345, قوستاناي وبلىسىندا 847, ماڭعىستاۋ وبلىسىندا 177, پاۆلودار وبلىسىندا 576, سولتۇستىك قازاقستان وبلىسىندا 709, وڭتۇستىك قازاقستان وبلىسىندا 1029, استانا قالاسىندا 254 جانە الماتى قالاسىندا 513 سايلاۋ ۋچاسكەسى جۇمىس ىستەيدى»، - دەدى ول.

اۆتور: مارلان جيەمباي