ءار بالاعا - 21 مىڭ تەڭگە: جاردەماقىعا وتىنىشتەر قابىلدانا باستادى
اتاۋلى الەۋمەتتىك كومەكتىڭ بۇل ءتۇرى تۇرمىسى تومەن بارلىق وتباسىلارعا بەرىلەدى، دەپ حابارلايدى قازاقپارات ءتىلشىسى.
ق ر ەڭبەك جانە حالىقتى قورعاۋ مينيسترلىگىنىڭ مالىمەتىنە سايكەس، 21 مىڭ تەڭگەلىك جاردەماقىعا كوپبالالى وتباسىلار عانا ەمەس، ءبىر بالاسى بار انالار دا ىلىگە الادى. «اتاۋلى الەۋمەتتىك كومەك كوپبالالى جانە از قامتىلعان وتباسىلارعا بەرىلۋى شارت. بۇل - پرەزيدەنتتىڭ تاپسىرماسى. ال الەۋمەتتىك جاعىنان از قامتىلعان وتباسىدا ءبىر بالا نەمەسە ەكى بالا بولۋى مۇمكىن عوي. ونداي وتباسىلاردىڭ ءبىر ايلىق تابىسى ادام باسىنا شاققاندا 20789 (كۇنكورىس مينيمۋمنىڭ 70 پروتسەنتى - اۆت.) اسپاسا، ءبىر بالاعا 21 مىڭ تەڭگەگە جۋىق جاردەماقى تاعايىندالادى»، - دەلىنگەن مينيسترلىكتىڭ تۇسىنىكتەمەسىندە.
وسى ورايدا ماماندار ءبىر بالاسى بار وتباسىنا جاڭا جاردەماقى تولەۋگە قاتىستى مىسالدى دا كەلتىردى. ماسەلەن، ءبىر ايەل جالعىز بالاسىن اسىراپ وتىر. ال ونىڭ ءبىر ايلىق جالاقىسى 40000 تەڭگەنى قۇرايدى. وسى اقشانى ەكى ادامعا بولگەندە تۋرا 20000 مىڭنان كەلەدى. دەمەك، وتباسىنىڭ ءبىر ايلىق تابىسى ادام باسىنا شاققاندا كۇنكورىس مينيمۋمنىڭ 70 پروتسەنتى - 20789 تەڭگەدەن اسپايدى. زاڭ بويىنشا بالاعا 21 مىڭ تەڭگەنىڭ جاردەماقىسى تولەنۋى كەرەك.
«ال اناسىنا 20000 مەن 20789 تەڭگەنىڭ ايىرماشىلىعى تولەنەدى. سوندا بالانىڭ جاردەماقىسىن قوسقاندا اتالعان وتباسى اي سايىن 22 مىڭ تەڭگەگە جۋىق اتاۋلى الەۋمەتتىك كومەكتى الىپ تۇرادى»، - دەپ اتاپ كورسەتتى ماماندار.
ءار بالاعا 21 مىڭ تەڭگەدەن بەرىلەتىن جاردەماقىنى الۋ ءۇشىن وتىنىشتەن باسقا ەشقانداي قۇجاتتار قاجەت ەمەس. ونى جەرگىلىكتى اكىمدىككە، حالىققا قىزمەت كورسەتۋ ورتالىعىنا، ءيا بولماسا، جۇمىسپەن قامتۋ ورتالىعىنا تاپسىرىپ كەتۋگە بولادى. سول جەردە جەكە كۋالىكتى كورسەتىپ، وتىنىشتە وتباسىنىڭ بارلىق مۇشەلەرىن جازىپ شىعۋ قاجەت. قالعان جۇمىستى مەملەكەتتىك قىزمەتكەرلەر وزدەرى اتقارادى. ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆتىڭ ايتۋىنشا، ماماندار وتىنىشتە كورسەتىلگەن بارلىق مالىمەتتەردى ەلەكتروندى بازامەن سالىستىرادى. ال قانداي دا ءبىر قۇجات جەتپەي جاتسا، حالىقتى ارى- بەرى شاپقىلاتپايدى. ولار قاجەتتى اقپاراتقا وزدەرى سۇراۋ سالىپ، ءتيىستى مەملەكەتتىك ورگانداردان الدىرتادى. سوسىن جاردەماقىنى الۋ ءۇشىن تۇراقتى، ءيا بولماسا، ۋاقىتشا تىركەۋ بولۋى شارت. بارلىق قۇجاتتاردى التى ايدا ءبىر رەت جاڭارتىپ وتىرادى.
ءبىر ءۇيدىڭ تابىسىن ەسەپتەگەندە تەك جاقىن تۋىستاردىڭ ءبىر ايدا تاباتىن اقشاسى عانا ەسكەرىلەدى. ولاردىڭ ىشىندە اتا-انالار، بالالار، اكەسى ءبىر، شەشەسى بولەك اعايىندار، اتا-اجەلەر بار. بۇل دەگەنىمىز، وسى ادامدار بىرگە تۇرسا، ولاردىڭ تابىسى ءبىر وتباسىنىڭ كىرىسى رەتىندە سانالادى. قوسالقى شارۋاشىلىق تا كىرىستىڭ كوزى بولىپ ەسەپتەلەدى. الايدا باسقا الەۋمەتتىك تولەمدەر ەسەپكە الىنبايدى. سونىڭ ىشىندە كوپبالالى وتباسىنىڭ قازىرگى مەملەكەتتىك جاردەماقىسى (4,16 ا ە ك - 10504 تەڭگە)، «كۇمىس القا» مەن «التىن القا» - نىڭ تولەماقىسى (6,4 ا ە ك - 16160 تەڭگە)، مۇگەدەك بالالاردىڭ جاردەماقىسى مەن ستيپەنديالار بار.
قازىرگى زاڭناماعا سايكەس، اتاۋلى الەۋمەتتىك كومەك كامەلەتتىك جاسقا دەيىن تولەنەدى. ءبىراق بالا كوللەدج، ءيا بولماسا، ۋنيۆەرسيتەتكە ءتۇسىپ كەتسە، ارتىنان جوعارى وقۋ ورنىنان كەيىنگى ءبىلىم السا، جاردەماقى 23 جاسقا دەيىن تولەنە بەرەدى. سوسىن استانا، الماتى مەن ماڭعىستاۋ وبلىسىندا جاردەماقىنىڭ مولشەرى ءسال كوبىرەك بولادى. سەبەبى ول جەردە حالىقتىڭ كۇنكورىسىنىڭ دەڭگەيى جوعارى.
ايتا كەتەيىك، بۇعان دەيىن قازاقپارات ءتىلشىسى 1- ساۋىردەن باستاپ تاعايىندالاتىن اتاۋلى الەۋمەتتىك كومەكتىڭ نەگىزگى شارتتارىن ساراپتاپ شىققان بولاتىن.
