تەننيس: الەمنىڭ بۇرىنعى ءبىرىنشى راكەتكاسى 21 جاسار سپورتشىدان جەڭىلىپ قالدى

استانا. قازاقپارات - بۇگىن تەننيستەن مەلبۋرن قالاسىندا ءوتىپ جاتقان اۆستراليا اشىق چەمپيوناتىندا كۇتپەگەن وقيعالار تىركەلدى، دەپ حابارلايدى «قازاقپارات» ءتىلشىسى.

الەمنىڭ بۇرىنعى ءبىرىنشى راكەتكاسى، اۆستراليا چەمپيوناتىنىڭ التى دۇركىن جەڭىمپازى، اتاقتى سەربيالىق تەننيسشى نوۆاك دجوكوۆيچ ازيانىڭ جارىق جۇلدىزى، 21 جاسار وڭتۇستىك كورەيالىق چحۋن حەننەن ۇتىلىپ قالدى. تاماشا ويناعان چ. حەن 3 ساعات 24 مينۋتقا سوزىلعان ماتچتا 7:6 (7:4) ، 7:5, 7:6 (7:3) ەسەبىمەن جەڭىسكە جەتتى. ءسويتىپ ول وڭتۇستىك كورەيا ەلىنىڭ تاريحىندا تۇڭعىش رەت اۆستراليا بىرىنشىلىگىنىڭ شيرەك فينالىنا جولداما الدى.

ءبىر قىزىعى، چ. حەن بالا كەزىندە ن. دجوكوۆيچتى ءپىر تۇتقان كورىنەدى. ەندى ونىڭ شيرەك فينالداعى قارسىلاسى - امەريكالىق تەننيس ساندگرەن. دۇنيەجۇزىلىك رەيتينگتە 97- ورىندا تۇرعان ت. ساندگرەن دە بۇگىن سەنساتسيا جاساپ، اۆستراليا ەلىنىڭ باستى ءۇمىتى، وسى تۋرنيردىڭ بەسىنشى راكەتكاسى دومينيك ءتيمدى اسا تارتىستى ماتچتا ۇتىپ كەتتى.

ءتورت ساعاتقا جۋىق ۋاقىتقا سوزىلعان كەزدەسۋدە امەريكالىق تەننيسشى 6:2, 4:6, 7:6 (7:4) ، 6:7 (7:9) ، 6:3 ەسەبىمەن جەڭىسكە جەتتى. ەندى كۇتپەگەن ناتيجەگە قول جەتكىزگەن قوس سپورتشى سارسەنبى كۇنى ءوزارا كەزدەسىپ، جارتىلاي فينال جولداماسىن ساراپقا سالادى.

ايتا كەتەيىك، اۆستراليا چەمپيوناتىندا ەرلەر اراسىنداعى جەكەلەي سىنعا قازاقستاننان جالعىز قاتىسقان ميحايل كۋكۋشكين العاشقى اينالىمنان اسا الماعان بولاتىن.