الماتى اكىمدىگى 21-مامىردا جەر ماسەلەسى بويىنشا نارازىلىق اكتسياسىن وتكىزۋگە رۇقسات بەرمەدى
«سوڭعى ۋاقىتتا جەر ماسەلەسىنە بايلانىستى ءتۇرلى الىپ-قاشپا اڭگىمەلەر بەلەڭ الىپ وتىر. كەيبىر جەكە تۇلعالار قازاقستاندا جەردىڭ شەتەلدىكتەرگە ساتىلاتىندىعى جايىندا جالعان اقپارات تاراتىپ، ازاماتتاردى ارانداتىپ، اعىمداعى جىلعى 21- مامىردا رۇقسات ەتىلمەگەن نارازىلىق اكتسيالارىنا شاقىرىپ ءجۇر»، - دەلىنگەن حابارلامادا.
ەلباسى ق ر جەر كودەكسىنە ەنگىزىلگەن ءتورت تۇزەتۋدىڭ كۇشىنە ەنۋىنە موراتوري جاريالاعانى بەلگىلى. سونىمەن قاتار، مەملەكەت باسشىسىنىڭ تاپسىرماسى بويىنشا ق ر جەر كودەكسىنىڭ نورمالارىن تالقىلاۋ مەن ءتۇسىندىرۋ جانە ۇسىنىمدار ازىرلەۋ ءۇشىن جەر رەفورماسى جونىندەگى كوميسسيا قۇرىلدى. ول قازىر جۇمىس ىستەپ جاتىر.
بۇگىن، الماتى قالاسىنىڭ اكىمدىگى اعىمداعى جىلعى 21- مامىردا جەر ماسەلەسى بويىنشا نارازىلىق اكتسياسىن وتكىزۋگە قاتىستى كەلىپ تۇسكەن وتىنىشتەردى قاراپ، اكتسيانى وتكىزۋگە رۇقسات بەرمەدى.
وسىعان بايلانىستى الماتى قالاسىنىڭ پروكۋرورى بەرىك اسىلوۆ تۇرعىندار مەن الەۋمەتتىك جەلىلەردى قولدانۋشىلاردى زاڭناما تالاپتارىن بۇزۋعا جول بەرمەۋگە شاقىردى.
«رۇقسات ەتىلمەگەن نارازىلىق اكتسيالارىن وتكىزۋگە شاقىرعان جانە وعان قاتىسقان، سونىمەن قاتار، الەۋمەتتىك جانە ۇلتتىق ارازدىقتى قوزدىراتىن بەلگىلەرى بار جاريالانىمداردى ورنالاستىرعان نەمەسە تاراتقان تۇلعالاردىڭ ق ر اكىمشىلىك قۇقىق بۇزۋشىلىق كودەكسىنىڭ 488-بابى مەن ق ر قىلمىستىق كودەكسىنىڭ 174، 274 جانە 400- باپتارى بويىنشا اكىمشىلىك جانە قىلمىستىق جاۋاپكەرشىلىككە تارتىلاتىندىعىن ەسكەرتەمىن»، - دەدى ب. اسىلوۆ.
اۆتور: ايبوتا جاپپاربەرگەن
