قازاقتىڭ 21 حانى مەن يگى جاقسىلارى جەرلەنگەن تۇركىستاندا ارنايى مۋزەي اشۋ كەرەك - دەپۋتات ق. ايتاحانوۆ

استانا. قازاقپارات - بۇگىن پارلامەنت سەناتىنىڭ جالپى وتىرىسىندا سەناتور قۋانىش ايتاحانوۆ تۇركىستان قالاسىندا قازاق حاندىعىنىڭ مۋزەيىن اشۋ تۋرالى ۇسىنىس جاسادى.

سەناتور اعىمداعى جىلدىڭ ەرەكشەلىگىنە توقتالا كەلە، تۇڭعىش رەت ەلىمىزدە كەڭ كولەمدە قازاق حاندىعىنىڭ 550 جىلدىعى تويلاناتىنىن اتاپ ءوتتى. ال ونداعى جوسپار بويىنشا باستى ءىس-شارالار قازاق حاندىعى قۇرىلعان ءوڭىر رەتىندە جامبىل وبلىسىندا ۇيىمداستىرىلماق.

«بۇل رەتتە عاسىرلار بويى قازاق حاندىعىنىڭ استاناسى بولعان جانە حاندارىمىز بەن باتىرلارىمىزدىڭ، بيلەر مەن شەشەندەرىمىزدىڭ ماڭگىلىك مەكەنى قاسيەتتى تۇركىستان قالاسىنا ارتىلار جاۋاپكەرشىلىك از ەمەس. قازاق تاريحىندا نەبىر ءىرى ماڭىزدى وقيعالار وسى تۇركىستان قالاسىندا ورىن العان بولاتىن»، - دەدى سەناتور. وسىعان وراي، دەپۋتات قۋانىش ايتاحان ۇلى قازاق حاندىعىنىڭ 550  جىلدىق مەرەيتويىن تويلاۋ اياسىندا تۇركىستان قالاسىندا رەسپۋبليكالىق حالىقارالىق دارەجەدە اۋقىمدى ءىس-شارالار ۇيىمداستىرىلۋى تيىستىگىن اتاپ ءوتتى.

«بۇل رەتتە قازاق حاندىعى دەگەندە تۇركىستان اتاۋى ەرىكسىز ەسكە ورالادى. ويتكەنى، مۇندا قازاقتىڭ 21 حانى مەن وزگە دە يگى جاقسىلارى جەرلەنگەن. وسىعان وراي، قازاق حاندىعىنىڭ 550  جىلدىعى قارساڭىندا تۇركىستان قالاسىندا ارنايى مۋزەي اشۋ تاريحىمىزعا ۇلكەن قۇرمەت بولار ەدى»، - دەيدى سەناتور.

بۇدان بولەك، دەپۋتات قازىرگى تاڭدا تۇركىستاندا قالالىق قازىناشىلىق ءبولىمى ورنالاسقان ازىرەت سۇلتان كەسەنەسى ماڭىندا 1903 - جىلى سالىنعان پاتشالىق اسكەري گارنيزون شتابى رەتىندە قىزمەت جاساعان تاريحي عيمارات بار ەكەنىن، وسىنى قازاق حاندىعىنىڭ مۋزەيى ەتىپ اشۋعا تولىق بولاتىنىن العا تارتادى.

اۆتور: قانات مامەتقازى ۇلى