قايراتتىڭ ومىرىندەگى 21 سانى نەنى ايقىندايدى؟

استانا. قازاقپارات - ەلدىگىمىز ەڭسە تۇزەپ، حالقىمىز تاۋەلسىزدىك تۇعىرىنا كوتەرىلگەن تۇستا جەلتوقسانشىلاردىڭ ەرلىگى تاريحتان ويىپ تۇرىپ ورىن الدى.

بىرەۋلەر بۇل وقيعانى «قوزعالىس دەپ اتاۋ كەرەك!» دەسە، ەندى ءبىرى «بۇل -  ناعىز كوتەرىلىس!» دەپ باعا بەردى. قالاي دەسەك تە، قازاقتىڭ شيرىعىپ تۇرعان جاستارى نامىسقوي، ءور تۇلعالى ەل ەكەنىمىزدى پاش ەتىپ كەتتى.

 سول تۇستارى:

جيىرما بىردە جاسىم بار،

قايرات دەگەن اتىم بار.

ەركەك توقتى قۇرباندىق،

اتام دەسەڭ، اتىڭدار! - دەپ شىرىلداعان 21 جاستاعى قايراتتىڭ ءۇنى قازىردە ХХІ عاسىرعا دەيىن جەتتى. جالپى، 21 جاس، ХХІ عاسىر دەگەننەن شىعادى. قايراتتىڭ ومىرىندەگى ناق وسى 21 سانىنا قاتىستى تۇيدەكتەلەر تاريحي قۇندىلىقتار بارشىلىق. مىسالى، 21 سانىنا قاتىستى تۇزىلگەن قايراتتىڭ تاعدىرىن تىزبەكتەپ كورەلىكشى: قايرات 21 جاسىندا، سوت الدىندا 21 كۇن ناقاقتان-ناقاق كۇيىپ، تاس تۇرمەنىڭ 21-كامەراسىندا، 21- مامىر كۇنى باقيلىق بولعان. ال ونىڭ تۇپ-تۋرا بەس جىل وتكەن سوڭ 21- اقپاندا اقتالۋى، كەزدەيسوقتىق پا الدە تاعدىر ما؟!

بۇل رەتتە بەلگىلى جۋرناليست قايىم-مۇنار تابەي «قازاقتىڭ جەلتوقسانى» اتتى كىتابىندا: «قايرات 21 جاسىندا، 21- مامىردا سەمەي تۇرمەسىندە، ونىڭ 21- كامەراسىندا قاسكويلىكپەن ءولتىرىلدى. ولتىرگەن كىم؟ ارينە، قاسىنداعى بۇرىن التى رەت سوتتالعان كانىگى قىلمىسكەر لەونيد ۆلاسەنكو بولۋى ابدەن مۇمكىن. الايدا ول دا وڭاي ۇيعارىم. ولاي دەيتىنىمىز، سول بۇرىنعى كوممۋنيستىك يمپەريالىق جۇيەنىڭ بىرەۋدىڭ قولىمەن وت كوسەۋگە بەيىم بولعانى ايتپاسا دا تۇسىنىكتى.

ءيا، قايراتتىڭ تاعدىرىنا بايلانىستى كۇنى بۇگىنگە دەيىن انىقتالماي كەلە جاتقان جۇمباق جاعدايدىڭ ءبىرى دە وسى»، -  دەيدى. جالپى، قايىم-مۇنار تابەي مىرزانىڭ ايتۋىنشا، قايراتقا سول كەزدەگى بيلىك تاراپىنان جاسالعان قىساستىقتىڭ ەشقايسىسىن كەزدەيسوقتىق دەي المايمىز. «ءتىپتى، باسقاسى-باسقا، ونىڭ مۇردەسىنىڭ قايدا جەرلەنگەنى كوپ ۋاقىتقا دەيىن بەلگىسىز بولىپ كەلسە، ول نەمقۇرايدىلىق ەمەس، ول - ناعىز قىساستىقتىڭ تاپ ءوزى».

ابزالىندا، قايرات عۇمىرى قىسقا بولسا دا، قازاق حالقىنىڭ ساناسىندا تۋعان ۇلتىنىڭ ازاتتىعى، تاۋەلسىزدىگى جولىندا قانداي باتىل قادامعا بولسا دا بارۋعا قابىلەتتى، ەرجۇرەك ازامات رەتىندە ساقتالىپ قالدى. قايراتتىڭ تاعدىرىنا قاتىستى تۇزىلگەن 21 سانىنىڭ ءوزى بۇلاردى ايقىنداي تۇسەتىندەي. ماسەلەن، سان اتاۋلىعا ەرەكشە ءمان بەرەتىن استرولوگ عالىمدارىمىزدىڭ پايىمداۋىنشا، 21 سانىنىڭ ءوزى قايراتتىڭ مىنەز-قۇلقىن ايشىقتاپ تۇر.

ايساۋلە شاياحمەتوۆا، استرولوگ-عالىم:

-  استرولوگيا عىلىمى سانعا ۇلكەن ءمان بەرەدى. عىلىمعا سەنسەك، ءاربىر ساننىڭ ءوز ءمانى، ەنەرگياسى بار، ءبىز ونى سەزبەۋىمىز دە مۇمكىن. مىسالى، 8 سانىن كولدەنەڭ قويساڭ، شەكسىزدىك بەلگىسى پايدا بولادى. سوندىقتان قازىر كوپتەگەن ەلدەردە 8 سانى «بايلىق-باقىت» بەلگىسى دەپ تە اتالىپ ءجۇر. ال بارلىق جاقسى نارسەلەر جۇپتان تۇرادى دەپ ەسەپتەيتىندىكتەن، 21 سانى دا ءساتتى سانعا جاتادى. 2 مەن 1 سانى جۇپتاسىپ كەلەتىندىكتەن بۇل ساندار كوشباستاۋشىلىق قاسيەتتى، تۇراقتىلىقتى، بىرلىكتە بولۋدى ايقىندايدى. سوندىقتان ادام ومىرىندەگى 21 سانى وسىنداي ايتۋلى بەلگىلەردەن سىر بەرەدى. قىتاي ەلىندە ايدىڭ 21 ىندە تۋىلعان ادامدارعا ەرەكشە قۇرمەت كورسەتىلىپ، ولاردى بارىنشا اسپەتتەۋگە تىرىسادى. اڭعارعانعا، قىتاي ەلىنىڭ ءبىزدىڭ ەرامىزعا دەيىنگى اتى اڭىزعا اينالعان بيلەۋشىلەرى ياو بيلەۋشى مەن شۋن بيلەۋشى ەرگەۋ (ناۋرىز) ايىنىڭ 21 ىندە دۇنيەگە كەلگەندىگى تۋرالى تاريحتان بەلگىلى. ساندارعا ايرىقشا كوڭىل بولەتىن قىتاي حالقى ايدىڭ وسى جۇلدىزىندا تۋعان ادامدار بيلىككە، كوشباسشىلىققا وتىرسا قۋانادى». سوندىقتان مۇنداي ساننىڭ الار ورنى ەرەكشە.

ءسويتىپ، 21 سانىنىڭ سىرى كوشباسشىلىققا، بىرلىكتە بولۋعا، تۇراقتىلىققا باستايتىنىن ماماندار دا راستاپ وتىر. ەندەشە، ساندار سىرىنىڭ ءوزى قايراتتاي اسقاق رۋحتى ۇلىمىزدىڭ قاسيەتىن ودان ءارى ايقىنداي ءتۇسىپ وتىرعان جوق پا؟

جالپى، قازاق - تاۋەلسىزدىك جولىندا تولارساعىنان سۋ كەشىپ، «ۇرپاعىمدى بودان قىلمايمىن» دەپ جاۋىمەن بەل شەشىپ ايقاسقان كۇرەسكەر حالىق. سول كۇرەسكەرلىكتىڭ قالىپتاسقان كورىنىسىن جەلتوقسان قۇرباندارى ايشىقتاپ تا بەردى. ولار تاۋەلسىزدىك تۇعىرىنا قونۋىمىزعا وزىندىك سارا جول سالدى. سول كۇنگى وقيعانى بويىنا جيىپ تىتىركەنگەن الاڭعا بۇل كۇنى تاۋەلسىزدىك مونۋمەنتى قويىلىپ، دەربەستىگىمىزدىڭ تاڭى اتتى.

جەلتوقسانشىلاردىڭ ەرلىگىن ۇلىقتاپ، ۇلتىمىزدىڭ مەرەيى ءوستى. ازاپتىڭ تەزىنە تۇسكەن 86-نىڭ قىرشىندارى اقتالىپ، قازاقتىڭ رۋحى ودان ءارى اسقاقتاي ءتۇستى. بۇل كۇنى ەۋروپالىقتار قازاقستاندى «ت م د ەلدەرى بويىنشا بويىنا تۇراقتىلىقتى سەرىك ەتكەن ەل» دەپ باعالاپ وتىر. وسى تۇستا ءبىز دە قاراپ قالماي، ەكونوميكاسى دامۋشى ەلدەردىڭ قاتارىنا قوسىلۋ ءۇشىن ءبىرقاتار يگى شارالار اتقاردىق.

مەملەكەتىمىزدىڭ ەكونوميكالىق- ساياسي- الەۋمەتتىك قادامدارىنىڭ ايشىقتالا باستاعانىن جالپاق جۇرتقا ايگىلەۋ ماقساتىندا «باسەكەگە قابىلەتتى ەلۋ ەلدىڭ ساپىنا ەنەمىز» دەپ جاتىرمىز. الەم جاھاندانۋ ۇردىسىنە ىلەسىپ جاتقان كەزەڭدە قاراپ قالماي، كوشكە ىلەسۋگە بارىمىزدى سالۋدامىز. « ХХІ عاسىردى تەحنولوگيالىق دامۋ عاسىرى» دەپ ۇرانداعان دامۋشى ەلدەردىڭ تاجىريبەسىنە سۇيەنىپ، تەحنولوگيا سالاسىنىڭ دا ءتىلىن تابۋعا ۇمتىلىپ ءجۇرمىز. دەسەك تە، قازاقتىڭ تىندىرعان ىسىنەن تىندىرارى كوپ ەكەنىن، تاۋەلسىزدىگىمىزدىڭ بۋىنى قاتايىپ، بۇعاناسى بەكي تۇسكەنىمەن، ءالى دە جەتپەگەن جەتىستىكتەرىمىز بار ەكەنىن مويىنداۋ كەرەك.

ءتۇيىن

ءبىز جىل سايىن جەلتوقسان وقيعاسى قارساڭىندا جەلتوقسان جايلى تىڭ دەرەكتەر ىزدەيتىن بولدىق. قوعامدا: «جەلتوقسان وقيعاسى زەرتتەۋشىلەر تاراپىنان ءالى جان-جاقتى سارالانباعان» دەگەن پىكىرلەر دە اراكىدىك ايتىلىپ قالادى. كۇندەلىكتى كۇيبەڭمەن ءجۇرىپ، جەلتوقسان وقيعاسىنىڭ تاريحي ماڭىزىن ءالى دە تولىق دارەجەدە باعالاپ ۇلگەرمەگىنىمىزدى، بۇل وقيعاعا قاتىستى ءالى دە ماڭىزدى زەرتتەۋلەردىڭ قاجەتتىگىن ءبىز مويىنداۋىمىز كەرەك. راس، جىل وتكەن سايىن جاسىنداي جالت ەتكەن جەلتوقسان جارقىلى ۋاقىت قويناۋىنا ءسىڭىپ، الىستاپ بارا جاتىر. كەشەگى 21 جاسىندا مەرت بولعان قايراتتاردىڭ ەرلىگىن ХХІ عاسىر ۇرپاقتارى دا جىر قىلىپ تولعاۋدان جالىقپاس. تەك بەلگىلى تاراپتان قاھارماندار ەرلىگىن ناسيحاتتاۋ جاعى وزىندىك بيىگىنە جەتسىن دەيىك.

«الاش ايناسى»