قازاقستان-فينليانديا ويىنىندا كورەرمەندەرگە 20 مىڭ تۋ تاراتقان نۇرلان قويانبايەۆ قانشا قارجى جۇمساعانىن ايتتى
Massaget.kz ءتىلشىسى نۇرلان قويانبايەۆپەن سۇحباتتاسىپ، بۇل يدەيا قالاي كەلگەنىن، قانشا قارجى جۇمساعانىن سۇرادى.
الەۋمەتتىك جەلىلەردە «استانا ارەنادا» وتكەن قازاقستان مەن فينليانديا اراسىندا وتكەن ويىننىڭ ۆيدەولارى تاراپ جاتىر. وندا الاڭنىڭ كوك تۇسكە بويالعانى، كورەرمەندەردىڭ ءبىراۋىزدان قولداۋ كورسەتكەنى بايقالادى. سونداي-اق، ءار تايمنىڭ وتىزىنشى مينۋتىندا رۋح بەرەتىن «اتامەكەن» ءانى دە شىرقالعان.
بۇل ءىس كوپشىلىكتى ءتانتى ەتكەن. الەۋمەتتىك جەلى قولدانۋشىلارى اراسىندا قازاقستان قۇراماسى بۇل كەزدەسۋدە جەڭىلىس تاپسا دا، ءدال وسى ءىس قۇراماعا دا، جانكۇيەرلەرگە دە كوماندالىق رۋح بەرگەنىن ايتقاندار تابىلعان.
«نۇرەكەڭ، مولودەتس، ىلعي وسىنداي پاتريوتتىق تاربيە ءىس جاساۋمەن اينالىسادى»، «قازاق فۋتبولىن دامىتىپ، كوتەرىپ جاتقانىڭىزعا راحمەت»، «قولداۋدا ءمىن جوق ەندى!!! العا قازاق ەلى!»، «كەرەمەت تۇركيانىڭ ستاديونىندا وتىرعانىنداي بولدىم، ولار تۋمەن وتىرادى عوي»، «ەشتەڭە ەتپەيدى، جاقسى موتيۆاتسيا كەلەسى ويىنعا، قانداي جاعداي بولسا قولدايمىز، ءبىز بىرگەمىز»، - دەپ جازدى الەۋمەتتىك جەلىدەگىلەر.
نۇرلان قويانبايەۆ تۋ تاراتۋ تۋرالى يدەيانى بىرنەشە اي بۇرىن باستاعانىن، شەت ەلدەرگە تاپسىرىس بەرگەنىن ايتادى.
«3 اي بۇرىن دايىندالدىم. قازاقستان قۇراما كومانداسى ويىندارى كۇزدە بولاتىنىن بىلەمىن. كوك تۋلاردى ساتىپ الىپ تاراتايىن دەگەنمىن. قاراسام قازاقستاندا ونداي جوق ەكەن. ءبىر دۇكەندە 100 ءى بار، ەكىنشى دۇكەندە 70 ءى بار. 30 مىڭ، 20 مىڭ جوق ەكەن. شەتەلدەن تاپسىرىس بەرىپ تىكتىرتتىك. جان-جاقتان تىكتىرتتىك. الماتىدان دا، تۇركيادان دا، قىتايدان دا تىكتىرتتىك. كەشە الىپ كەلدىك. زورعا ۇلگەردىك. 20 مىڭ تۋ تاراتتىق»، - دەيدى نۇرلان قويانبايەۆ.
Посмотреть эту публикацию в Instagram
نۇرلان قويانبايەۆ بۇل ىسكە قانشا قارجى جۇمسالعانىن دا ايتتى.
«جولىمەن 50-60 مىڭ دوللار كەتكەن شىعار. قازاقستاننىڭ ستاديونى ادەمى بولسىن دەگەن ارمانىم بولدى»، - دەيدى ول.
الەۋمەتتىك جەلىدە تەگىن تاراتىلعان تۋلار كەيىن ساتىلعانى تۋرالى دا اقپارات تاراپ جاتىر.
«تەگىن تاراتىلعان تۋىمىزدى 10-15 شتۋكتاپ الىپ، ستاديوننىڭ الدىندا ساتىپ جۇرگەن يشاكتاردا ۇيات جوق!» - دەپ جازدى جەلىدەگىلەردىڭ ءبىرى.
نۇرلان قويانبايەۆ تۋلاردىڭ ءبارى تەگىن تاراتىلعانىن، ساتىپ جاتقاندار باسقا ادامدار بولۋى مۇمكىن ەكەنىن جەتكىزدى.
«باسقا ويىنداردا، حوككەيدە تۋ ساتادى عوي. سونداي ادامدار شىعار. نەگاتيۆ ىزدەيتىندەر عوي. ساتاتىن ادامدار حوككەيدىڭ الدىندا دا ساتادى عوي. تۋ تاراتۋ بىرلىكتىڭ قادامى عوي. كەز كەلگەن ۇلكەن جارىس - مەرەكە. حالىققا مەرەكە سەزىلۋى كەرەك»، - دەپ تۇيىندەدى نۇرلان قويانبايەۆ.
ەسكە سالايىق، بۇعان دەيىن فۋتبولدان قازاقستان قۇراماسى فينليانديادان ۇپاي ەنشىلەي الماعانى حابارلانعان ەدى. «استانا ارەنادا» وتكەن ويىندا قوناقتار 0:1 ەسەبىمەن جەڭىسكە جەتتى.
