تورەعالي تورەالى يزولياتورداعى 20 كۇندىك جازاسىنا تاعى ءۇش كۇن قوسىپ الدى

الماتى. قازاقپارات - ءانشى تورەعالي تورەالى قوسىمشا تاعى بىرنەشە كۇنگە قاماۋعا الىندى. بۇل تۋرالى الماتى قالالىق سوتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

قازاقستاندىق ءانشى اكىمشىلىك قۇقىق بۇزۋ تۋرالى كودەكستىڭ 613-بابى، 1-بولىگى (پوليتسيا قىزمەتكەرىنىڭ تالاپتارىن ورىنداماعانى ءۇشىن) بويىنشا قوسىمشا جاۋاپكەرشىلىككە تارتىلدى.

«ءىس ماتەريالدارىن زەردەلەپ، سوت 14- ماۋسىمدا ءاليحانوۆتىڭ (تورەعالي تورەالىنىڭ تەگى - اۆتور) ەسىرتكىگە ماس كۇيىندە اۆتوكولىك جۇرگىزگەنىن انىقتادى. ول پاترۋل پوليتسياسىنىڭ كولىك قۇرالىن توقتاتۋ تۋرالى زاڭدى تالاپتارىن ورىندامادى»، - دەپ حابارلادى سوتتان.

ناتيجەسىندە تورەعالي تورەالى كىنالى دەپ تانىلىپ، وعان ءۇش تاۋلىككە قاماۋعا الۋ تۇرىندە اكىمشىلىك جازا قولدانىلادى.

ەسكە سالا كەتەيىك، 14- ماۋسىم كۇنى الماتىدا ەسىرتكىگە ماسايعان كولىك جۇرگىزۋشى پوليتسەيلەرگە بوي بەرمەي، وقيعاعا ورنىنان قاشپاق بولعانى حابارلانعان ەدى.

پاترۋلدىك پوليتسيا قىزمەتكەرلەرى جۇرگىزۋشىنى ۇستاپ، مەديتسينالىق ساراپتاما ناتيجەسىندە ونىڭ ەسىرتكىگە ماس ەكەنى بەلگىلى بولدى.

سول كۇنى ەسىرتكىگە ماسايعان كولىك جۇرگىزۋشى اكىمشىلىك جاۋاپقا تارتىلدى. ول 20 تاۋلىككە قاماۋعا الىنىپ، 7 جىلعا كولىك جۇرگىزۋ قۇقىعىنان ايرىلدى.

سوت وتىرىسىندا قۇقىق بۇزۋشى ءىس ماتەريالدارىندا باياندالعان فاكتىلەردى راستاپ، وكىنەتىنىن ايتقان.

كەيىن تورەعالي تورەالىنىڭ قارىنداسى الەۋمەتتىك جەلىدە اعاسى تۋرالى اقپاراتتىڭ جالعان ەكەنىن جازدى.