قازاقستان جىل سايىن 20 وزبەكستاندىقتى ءوز ج و و- لارىندا وقىتۋعا نيەتتى

استانا. قازاقپارات - قازاقستان مەن وزبەكستان ۇكىمەتتەرى اراسىنداعى جوعارى جانە جوعارى وقۋ ورنىنان كەيىنگى ءبىلىم سالاسىنداعى ىنتىماقتاستىق تۋرالى كەلىسىم جوباسى جاريالاندى، دەپ حابارلايدى قازاقپارات ءتىلشىسى.

قۇجاتتا كورسەتىلگەندەي، تاراپتار دامىتۋعا مۇددەلى ءبىلىم سالاسىنداعى باسىم باعىتتار:

- ستۋدەنتتەرمەن، وقىتۋشى-پروفەسسور قۇرامىمەن، عىلىمي قىزمەتكەرلەرمەن الماسۋ؛

- جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ اراسىنداعى ىنتىماقتاستىقتى كەڭەيتۋ جانە تەرەڭدەتۋ؛

- وقىتۋشىلار مەن مامانداردى، عىلىمي-پەداگوگيكالىق كادرلار مەن عىلىمي قىزمەتكەرلەردى دايارلاۋ، قايتا دايارلاۋ جانە بىلىكتىلىگىن ارتتىرۋ؛

- بىرلەسكەن عىلىمي زەرتتەۋلەر جۇرگىزۋ.

كەلىسىمگە سايكەس، ەكى ەلدىڭ جۋاپتى ۆەدومستۆولارى ءوز ءبىلىم الۋىشالارىنا تاراپتاردىڭ ج و و- لارىندا وتەتىن كونكۋرستار مەن وليمپيادالارعا قاتىسۋىنا مۇمكىندىك بەرەدى.

«تاراپتار قازاقستان رەسپۋبليكاسىنىڭ جوعارى ءبىلىم بەرۋ مەكەمەلەرىندە وزبەك ءتىلىن، ادەبيەتى مەن مادەنيەتىن جانە وزبەكستان رەسپۋبليكاسىنىڭ جوعارى ءبىلىم بەرۋ مەكەمەلەرىندە قازاق ءتىلىن، ادەبيەتى مەن مادەنيەتىن وقىپ-ۇيرەنۋگە جانە وقىتۋعا قولداۋ كورسەتەدى.

تاراپتار جىل سايىن بالامالى نەگىزدە سانى 20 ادامعا دەيىن ءبىلىم الۋشىلارمەن الماسۋدى جۇزەگە اسىرادى، ونىڭ ىشىندە باكالاۆريات باعدارلامالارى بويىنشا - 14 ادام جانە ماگيستراتۋرا باعدارلامالارى بويىنشا - 6 ادام.

قابىلداۋشى تاراپ ءبىلىم الۋشىلاردى وقۋ قۇرالدارىن، عىلىمي-تەحنيكالىق قۇجاتتامانى، زەرتتەۋ جابدىعىن پايدالانعانى ءۇشىن تولەماقىدان بوساتادى. سونىمەن قاتار ءوز مەملەكەتىنىڭ ازاماتتارىمەن تەڭ جاعدايدا، جوعارى وقۋ ورنىنىڭ جاتاقحاناسىندا تۇرۋىن قامتاماسىز ەتەدى»، - دەلىنگەن قۇجاتتا.

بۇل كەلىسىمگە قازاقستان ۇكىمەتى اتىنان قول قويۋ وكىلەتتىلىگى عىلىم جانە جوعارى ءبىلىم ءمينيسترى ساياسات نۇربەككە بەرىلەدى.

قۇجاتتى اشىق تالقىلاۋ 23- قاراشاعا دەيىن جالعاسادى.