ەڭبەك مينيسترلىگى بيىل وقۋعا تۇسە الماعان 20 مىڭ جاسقا كاسىپتىك ءبىلىم بەرمەك
بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى سەرىك شاپكەنوۆ ايتتى، دەپ حابارلايدى قازاقپارات ءتىلشىسى.
«قازىرگى تاڭدا «ەڭبەك» باعدارلاماسىنا بايلانىستى 176 ميلليارد تەڭگە كولەمىندە قارجى ءبولىنىپ وتىر. پرەزيدەنتىمىزدىڭ تىكەلەي تاپسىرماسىنا سايكەس، باعدارلاماعا قوسىمشا 50 ميلليارد تەڭگە ءبولىندى. باعدارلامانىڭ ءبىرىنشى باعىتى وقۋ ماسەلەسىن قامتيدى. ارينە، ءبىز ءوزىمىزدىڭ ازاماتتارىمىزدى كاسىپتىك بىلىممەن قامتاماسىز ەتۋىمىز كەرەك. بۇگىنگى كۇنى از قامتىلعان نەمەسە كوپبالالى وتباسىلاردان شىققان بالالار ۇبت قورىتىندىسى بويىنشا جوعارى وقۋ ورنىنا تۇسە الماي قالسا، ءبىز ولارعا كاسىبي ءبىلىم بەرۋ ماقساتىندا تەحنيكالىق جانە كاسىپتىك ءبىلىم بەرەتىن بولامىز. 1 قىركۇيەكتەن باستاپ ىسكە اسادى. 20600 ادام قابىلدادى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، باعدارلامانىڭ كەلەسى باعىتى قىسقا مەرزىمدى وقىتۋدى كوزدەيدى. بۇل رەتتە 3-6 اي ارالىعىندا ازاماتتارعا كاسىپتىك ءبىلىم بەرىلەدى. قازىرگى ۋاقىتتا 11 مىڭ ازامات وقۋعا جىبەرىلگەن. ولاردىڭ 700 ءى وقۋىن بىتىرسە، 200 دەن استام تۇراقتى جۇمىس ورنىنا ورنالاسقان. ايتا كەتەرلىگى، كاسىپتىك ءبىلىم الىپ شىققان بۇل ازاماتتاردىڭ بارلىعى مىندەتتى تۇردە جۇمىسپەن قامتىلاتىن بولادى.
«باعدارلامانىڭ كەلەسى باعىتى - شاعىن نەسيە نەمەسە گرانتتار. وسى ورايدا ايتا كەتەرلىگى، شاعىن نەسيە مەن گرانتتاردى الاتىن ازاماتتارىمىزدى «بيزنەس باستاۋ» باعدارلاماسى بويىنشا وقىتامىز. بيىل 30 مىڭ ادامدى وقىتۋ جوسپارلانعان ەدى. بۇگىندە 23 مىڭ ادام وقىدى. ونىڭ ىشىندە 18 مىڭ ادام ءوز بيزنەس جوسپارلارىن قورعاپ شىقتى. 7 مىڭعا جۋىق ادام شاعىن نەسيەلەرىن الدى. شاعىن نەسيە العان 5800 ادام 6200 تۇراقتى جۇمىس ورنىن اشتى. 17200 گرانت بەرىلدى. نەگىزگى جوسپارىمىز - 23600. بۇل جۇمىس جىل بويى ارى قاراي جالعاسا بەرەدى جانە تۇراقتى باقىلاۋىمىزدا ۇستايمىز»، - دەدى ۆيتسە- مينيستر.
