قىرعىزستان پرەزيدەنتى استانانىڭ 20 جىلدىعىنا وراي جىلى لەبىزىن ءبىلدىردى
قىرعىزستان باسشىسىنىڭ ۆيدەوقۇتتىقتاۋىن قازاقستان پرەزيدەنتىنىڭ تەلەراديوكەشەنى جاريالادى، دەپ حابارلايدى «قازاقپارات» ح ا ا ءتىلشىسى.
«سىزدەردى باۋىرلاس قازاقستاننىڭ داڭقتى ەلورداسى - استانانىڭ مەرەيتويىمەن شىن جۇرەكتەن قۇتتىقتايمىن. استانا - بىزگە تۋىسقان مەملەكەتتىڭ ساياسي جانە ەكونوميكالىق جەتىستىكتەرىنىڭ قالاسى. ول ەلدىڭ ارتىپ كەلە جاتقان قۋاتى مەن بولاشاقتاعى وركەندەۋ الەۋەتىن كورسەتەدى»، - دەدى سوورونباي جەەنبەكوۆ.
قىرعىز رەسپۋبليكاسىنىڭ باسشىسى استانانىڭ دامۋى تاۋەلسىز قازاقستاننىڭ قالىپتاسۋ تاريحىنىڭ قۇرامداس بولىگى ەكەنىن اتاپ كورسەتتى.
«استانا الداعى ۋاقىتتا دا تاۋەلسىز قازاقستاننىڭ، ونىڭ كوپۇلتتى حالقىنىڭ بىرلىگىنىڭ، جاسامپازدىق كۇش- قۋاتىنىڭ سيمۆولى رەتىندە دامي بەرسىن، گۇلدەنە ءتۇسسىن. تۋىسقان قازاقستان حالقىنا اماندىق، بەيبىتشىلىك جانە گۇلدەنۋ تىلەيمىن»، - دەدى ول.
