تۇركيادا استانانىڭ 20 جىلدىعىنا ارنالعان كونسەرت ءوتتى
تۇركيانىڭ مەملەكەتتىك تەلەراديوكورپوراتسياسىنا قاراستى ت ر ت ستۋديو-زالىندا تىكەلەي ەفيردە جۇزەگە اسقان كونسەرتتىك باعدارلاماعا قازاقستاننىڭ تۇركياداعى ەلشىسى ابزال ساپاربەك ۇلى، تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ، ديپلوماتيالىق مەكەمەلەردىڭ، ىسكەر توپتاردىڭ وكىلدەرى جانە زيالى قاۋىم مەن جەرگىلىكتى حالىق قاتىستى.
دينا نۇرپەيىسوۆا اتىنداعى حالىقتىق مۋزىكا اكادەمياسى وركەسترى ونەر كورسەتكەن سالتاناتتى شارانىڭ اشىلۋىندا ءسوز سويلەگەن ەلشى ا. ساپاربەك ۇلى اتالعان كونسەرتتىك باعدارلامانىڭ ەلوردامىز استانانىڭ 20 جىلدىعىنا تارتۋ ەتىلىپ وتىرعانىن، سونداي-اق استانا مەن انكارانىڭ قالىپتاسۋ تاريحىندا ۇقساستىقتاردىڭ بار ەكەندىگىن اتاپ ءوتىپ، دايەكتى دەرەكتەر كەلتىردى. ەلىمىزدىڭ ونەرىن تانىستىرىپ، ابىرويىن اسقاقتاتقان وسىنداي يگى شارانىڭ وتۋىنە اتسالىسقان ت ر ت باس ديرەكسياسىنا جانە دينا نۇرپەيىسوۆا اتىنداعى حالىق مۋزىكا اكادەمياسى وركەسترىنىڭ ونەرپازدارىنا العىس ءبىلدىردى.
كونسەرتتىك باعدارلاما قازاقستاننىڭ حالىق ءارتيسى، كومپوزيتور ەسكەندىر حاسانعاليەۆتىڭ «جانارىم» شىعارماسىمەن باستالىپ، قازاق ۇلتتىق مۋزىكاسىنىڭ سيمۆولدارى - قۇرمانعازى، دينا نۇرپەيىسوۆا، سەيىلحان قيسانوۆ جانە ت. ب. بەلگىلى كومپوزيتورلاردىڭ تۋىندرلارىمەن جالعاسىن تاپتى.
ۇلتتىق كومپوزيتسيالارمەن قاتار الەمدىك كلاسسيكالىق مۋزىكا دا ورىندالدى. ۇلى دالا ەلىنىڭ مۋزىكالىق سالەمدەمەسىن جەتكىزگەن ونەرپازدار كورەرمەندەر تاراپىنان ىستىق ىقىلاس پەن قوشەمەتكە يە بولدى.
باعدارلامادا ءسوز سويلەگەن يا. توپچۋ ءتىلى، ءدىنى، تاريحى ءبىر دوستاس ەلدەردىڭ پرەزيدەنتتەرى اراسىنداعى قارىم-قاتىناستى ايرىقشا اتاپ ءوتتى. تۇركى الەمىنىڭ اقساقالى نۇرسۇلتان نازاربايەۆتىڭ پاراساتتى ساياساتىن اتاپ ءوتىپ، قازاقستانننىڭ دامۋىنىڭ جانە تۇركىتىلدەس ەلدەردىڭ قارىم-قاتىناسىنىڭ نىعايۋىنىڭ كەپىلى- ن. نازاربايەۆ ەكەنىن باسا ايتتى.
