كەز كەلگەن ازامات قاتىسا الاتىن بەلدەسۋدىڭ باس جۇلدەسى 20 ميلليون تەڭگە
«جالپى بەلدەسۋدىڭ قازاق كۇرەسىنەن ايىرماشىلىعى كوپ دەپ ايتا الامىن. ويتكەنى اتا- بابالارىمىز، قاجىمۇقان، بالۋان شولاق بابالارىمىز كەزىندە كۇرەسكە كەڭ شالبارمەن، بەلدىكپەن شىعاتىن بولعان. سولتۇستىكتە وتسە اياقتارىنا ەتىك كيگەن. ءبىز ءدال سول كۇرەس ءتۇرىن جاڭعىرتىپ، ءدال سونداي كيىمدەرمەن شىعاراتىن بولامىز»، - دەدى ول.
ارمان شورايەۆتىڭ ايتۋىنشا، «حالىق بارىسى» تۋرنيرىنە كەز كەلگەن ادام قاتىسا الادى. ءبىراق كاسىبي سپورتشىلار جارىسقا جىبەرىلمەيدى.
«قازاقستان بارىسى»، «ەۋرازيا بارىسى» سىندى جوبالارىمىزعا الدىن الا ىرىكتەۋ وتكىزسەك، مۇندا تازا دالا دەموكراتياسى بولادى. كەز كەلگەن قازاقستاننىڭ كامەلەتكە تولعان 18-دەن 50 جاسقا دەيىنگى ازاماتتارى قاتىسا الادى. 7 - مامىرعا دەيىن الماتىعا كەلىپ، تىركەۋدەن ءوتۋى كەرەك. ءبىزدىڭ بولجاۋىمىزشا، 1-2 مىڭ پالۋان جينالادى. 8 - مامىر كۇنى تاڭەرتەڭ باستالىپ، كۇنى بويى وتەدى. ءبىر كۇن جەتپەسە، ەرتەڭىندە ارى قاراي جالعاستىرامىز. جەڭگەن ادام «حالىق بارىسى» دەگەن اتاققا يە بولادى. ودان بولەك قوماقتى قاراجاتتى قالتاسىنا باسادى. شامامەن 20 ميلليون تەڭگەدەي»، - دەدى ارمان شورايەۆ.
سونىمەن بەلدەسۋ سپورتشىلارى بالاعى توبىققا دەيىن جەتەتىن قوڭىر ءتۇستى شالبار مەن كوك جانە قىزىل ءتۇستى جالپاقتىعى 8 س م قۇرايتىن جۇمساق ماتادان ارنايى بەلبەۋ تاعادى. كەۋدەسى بەلۋارعا دەيىن جالاڭاش بولادى. كۇرەس كوك ءشوپتىڭ ۇستىندە وتەدى. بەلدەسۋدە اۋىرتۋ، تۇنشىقتىرۋ سىندى ادىستەر قولدانىلمايدى. پالۋاندارعا 5 مينۋت ۋاقىت بەرىلەدى. وسى ۋاقىتتا جەڭىمپاز انىقتالماسا، 3 مينۋت ۋاقىت قوسىلادى. ال قوسىمشا ۋاقىتتا دا پالۋاندار تەڭ تۇسسە، وندا سالماعى جەڭىل پالۋان جەڭىسكە جەتەدى.
اۆتور: مارلان جيەمباي
