برازيليا تۇرمەسىندە جەتى اي جاتقان 20 جاستاعى قازاقستاندىق قىز بوساپ شىقتى
ول اقپان ايىندا سان-پاۋلۋ اۋەجايىندا 2 كەلى كوكاينمەن ۇستالعان بولاتىن. قازاقستاننىڭ برازيلياداعى ەلشىلىگىنىڭ بەلسەنە ارالاسۋىمەن 20 جاستاعى قىز تولىق اقتالىپ شىققان.
ونى برازيليادان باعالى تاستاردى جەتكىزىپ بەر دەپ تانىسى جىبەرگەن ەكەن. اقىسىنا 4 مىڭ دوللار بەرەتىن بولعان. الايدا سان-پاۋلۋدان الىپ شىققان جۇگىنىڭ اراسىنان پولتسيا ەسىرتكى تاۋىپ، قولىنا بىردەن كىسەن سالىپتى.
سويتسە، برازيلياعا جىبەرگەن تانىسى ارباۋ ارقىلى سول ەلدەن ەسىرتكى الدىرتپاق بولعان كورىنەدى. ەلىمىزدىڭ پوليتسياسى قىزدى جۇمساعان كەلىنشەكتى ۇستاپ، 6 جارىم جىلعا باس بوستاندىعىنان ايىردى. وسىنىڭ ارقاسىندا عانا برازيليا تەرگەۋشىلەرى سلاۆيانانى بوستاندىققا شىعارىپ وتىر.
دەگەنمەن، تاعى ءبىر قاراعاندىلىق قىز سول جاقتىڭ تۇرمەسىندە ءالى جاتىر. وسى كوكتەمدە الگى كەلىنشەكتىڭ تاپسىرماسىمەن شەتەل اسقان ول تۋرا وسىلاي ۇستالىپ، 7 جارىم جىلعا سوتتالىپ كەتىپتى. ونىڭ ىسىمەن دە ەلشىلىك اينالىسۋدا. ال سلاۆيانا جاقىن كۇندەرى ەلگە جەتكىزىلۋى ءتيىس.
«جاقىن كۇندەرى ول ءتولقۇجاتتارىن الۋى كەرەك. سودان كەيىن عانا ۇشاققا بيلەت الىپ وسىندا جەتكىزەمىز. ال ءالى تۇرمەدە وتىرعان ەكىنشى قىزعا ەلشىلىك كومەك بەرگەلى جاتىر. وسى جەردە سوتتالعان ايەل بويىنشا قۇجاتتار برازيليا سوتىنا جەتسە، ول قىز دا اقتالىپ شىعۋى مۇمكىن. جالپى ءبىزدىڭ سونداعى ەلشىلىككە العىسىمىز ۇشان-تەڭىز»، - دەيدى سلاۆيانانىڭ اناسى ۆيكتوريا مينيەۆسكايا.
