زەرتتەۋشىلەر 20 جىلدان كەيىن الەمدەگى مۇسىلمانداردىڭ سانى قالاي بولاتىنىن ايتتى

استانا. قازاقپارات - Pew Research Centre كومپانياسىنىڭ ءبىر توپ زەرتتەۋشىسىنىڭ حابارلاۋىنشا، مۇسىلماندار اراسىنداعى تۋۋ كورسەتكىشى ءوسىپ كەلەدى.

مامانداردىڭ سوزىنە سۇيەنسەك، تۋۋ كورسەتكىشى وسىنداي قارقىنمەن وسە بەرسە، 2035 -جىلعا قاراي جاڭا تۋعان مۇسىلماندار سانى حريستيان سابيلەرىنە قاراعاندا 1 ميلليونعا ارتىق بولادى ەكەن، ال وسى عاسىر سوڭىنا تامان يسلام الەمدەگى ەڭ كوپ تاراعان ءدىن بولادى، دەپ جازادى muftyat.kz.

ساراپتاما مالىمەتىنشە، 2035 -جىلعا قاراي 225 ميلليون مۇسىلمان قىز-كەلىنشەكتەرى بالالى بولىپ، انا اتانادى ەكەن، ال حريستيان دىنىندەگى ايەلدەر 224 ميلليون نارەستەنى دۇنيەگە اكەلەدى. 20 جىلدان سوڭ ەكى ءدىن وكىلدەرى اراسىنداعى بالا تۋۋ الشاقتىعى بەس ميلليونعا جەتۋى مۇمكىن. 2010-2015 -جىلدار اراسىندا بۇكىل الەمدە دۇنيەگە كەلگەن %31 ءسابي مۇسىلمان وتباسىندا دۇنيەگە كەلگەن.

ساراپشىلاردىڭ ايتۋىنشا، سوڭعى جىلدارى حريستياندار اراسىنداعى تۋۋ كورسەتكىشى ازايعان جوق، ءبىراق يسلام ءدىنىن ۇستانۋشىلاردىڭ كورسەتكىشىندەي جىلدام وسپەگەن. Pew Research Centre بولجاۋىنشا، 2050 -جىلعا دەيىن ءۇندىستان مۇسىلمانداردىڭ ەڭ كوپ جينالعان جەرىنە اينالادى. بۇل ەلدە بىرنەشە جىلدان كەيىن 300 ميلليون مۇسىلمان ءومىر سۇرەتىن بولادى.