رەسەي جانە قىتايمەن تاۋار اينالىمىمىز 20 ميلليارد دوللارعا جۋىق كەمىدى - ن. نازاربايەۆ
بۇگىن «قازاقستان رەسپۋبليكاسىنىڭ يندۋستريالدى- يننوۆاتسيالىق دامۋىنىڭ مەملەكەتتىك باعدارلاماسى: 2016-جىلدىڭ I جارتىجىلدىق قورىتىندىسى» اتتى كەڭەستە مەملەكەت باسشىسى نۇرسۇلتان نازاربايەۆ وسىلاي دەدى.
«ءبىز تابىس الىپ كەلە جاتقان اليۋميني، مىس، بولات سىندى بازالىق ەكسپورتتىق تاۋارلاردىڭ قۇنى 30-40 پايىزعا تومەندەدى. وسىنشاما كولەمدە ءبىزدىڭ تابىسىمىز دا كەمىدى. ءبىزدىڭ باستى سەرىكتەستەرىمىز رەسەي جانە قىتايمەن تاۋار اينالىمىمىز 26 ميلليارد دوللارعا دەيىن قىسقاردى. بۇرىن 47 ميلليارد دوللار بولعان ەدى»، - دەدى مەملەكەت باسشىسى.
ەلباسى وسىنداي قيىن داعدارىستى جاعدايدا ەكونوميكانى قولداۋ شارالارىن مەملەكەت تارابى تومەندەتپەگەندىگىن ءتۇسىنۋ قاجەتتىگىن باسا ايتتى.
«بۇل - دايىندالعانىمىزدىڭ، يندۋستريالاندىرۋ باعدارلاماسىن جاساعانىمىزدىڭ، شاعىن جانە ورتا بيزنەستى دامىتقاندىعىمىزدىڭ ارقاسى. ءبىزدىڭ حالقىمىز ساياساتتى دۇرىس جۇرگىزۋ تەك قانا ەكونوميكا تۇراقتىلىعىن ساقتاپ قانا قويماي سونىمەن بىرگە الەۋمەتتىك جاعدايدى دا ۇستاپ تۇراتىندىعىن ءبىلۋى قاجەت. «تاعى دا كوبىرەك بەر»، دەگەن كەزدە ونىڭ قايدان الىناتىندىعىن ءتۇسىنۋى ءتيىس»، - دەدى ق ر پرەزيدەنتى.
اۆتور: مارلان جيەمباي
