قازاقستان ينۆەستيتسيالاردى قولداۋ ماقساتىندا 20 ەلمەن كەلىسىم ازىرلەۋدە - ج. قاسىمبەك
بۇل تۋرالى پارلامەنت سەناتى ەكونوميكالىق ساياسات، وڭىرلىك دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا ينۆەستيتسيالار جانە دامۋ ۆيتسە-ءمينيسترى جەڭىس قاسىمبەك ءمالىم ەتتى.
كوميتەت وتىرىسىندا «قازاقستان رەسپۋبليكاسىنىڭ ۇكىمەتى مەن ماكەدونيا رەسپۋبليكاسىنىڭ ۇكىمەتى اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى تالقىلانعان بولاتىن.
ۆيتسە-ءمينيستردىڭ ايتۋىنشا، شەتەلدىك ينۆەستورلار ءۇشىن قولايلى جاعدايلار جاساۋ قازاقستاننىڭ ينۆەستيتسيالىق ساياساتىنىڭ باستى ماقساتتارىنىڭ ءبىرى بولىپ تابىلادى. سونىمەن قاتار، الەمدىك تاجىريبەدە تىعىز ەكونوميكالىق ىنتىماقتاستىق ەكى حالىقارالىق كەلىسىممەن ولشەنەدى، ونىڭ ءبىرىنشىسى - ينۆەستيتسيانى ءوزارا قورعاۋ بولسا، ەكىنشىسى - قوسارلانعان سالىقتى بولدىرماۋ.
«بۇگىنگى كۇنى قازاقتان وسىنداي 48 كەلىسىمگە قول قويعان. الداعى جوسپارلارعا سايكەس، ءبىز قوسىمشا 20 ەلمەن ءدال وسىنداي ينۆەستيتسيالار ءۇشىن جاعىمدى جاعداي جاسايتىن كەلىسىمدەردى ازىرلەپ جاتىرمىز. بۇل قۇجاتتار مەملەكەتتەر اراسىنداعى قارىم قاتىناستى ودان ءارى دامىتۋعا ءوز سەپتىگىن تيگىزەدى»، - دەدى ينۆەستيتسيالار جانە دامۋ ۆيتسە-ءمينيسترى ج. قاسىمبەك.
ونىڭ ايتۋىنشا، ماكەدونيامەن تىعىز ينۆەستيتسيالىق قارىم-قاتىناستى ورناتۋ ءۇشىن جاسالعان كەلىسىمنىڭ كۇشىنە ەنۋى ءوزارا ينۆەستيتسيا تارتۋ ءۇشىن ماڭىزدى قۇقىقتىق نەگىز قالىپتاستىرادى.
«ستاتيستيكا كوميتەتىنىڭ مالىمەتتەرىنە قاراعاندا، قازاقستان مەن ماكەدونيا اراسىنداعى تاۋار اينالىمى 2015-جىلى 2 ميلليون دوللاردى قۇرادى، ونىڭ ىشىندە ەكسپورت - 0,1 ميلليون دوللار، يمپورت - 1,9 ميلليون دوللار بولىپ وتىر. 2015-جىلدىڭ 1- جەلتوقسانىنداعى جاعدايعا سايكەس، قازاقستاندا ماكەدونيالىق تاراپ قاتىساتىن 8 زاڭدى تۇلعا، فيليالدار مەن وكىلدىكتەر تىركەلگەن»، - دەدى ج. قاسىمبەك.
اۆتور: قانات مامەتقازى ۇلى
