سايلاۋ كۇنى قوعامدىق ءتارتىپتى قاداعالاۋ ءۇشىن 20 مىڭنان استام ءتارتىپ ساقشىسى جۇمىلدىرىلعان
بۇل تۋرالى بۇگىن ورتالىق كوممۋنيكاتسيالار قىزمەتىنە كەلىپ، بريفينگ وتكىزگەن ىشكى ىستەر ءمينيسترىنىڭ ءبىرىنشى ورىنباسارى مارات دەمەۋوۆ ءمالىم ەتتى.
«ىشكى ىستەر ورگاندارىنىڭ 20 مىڭنان اسا قىزمەتكەرى سايلاۋ كۇنىندە قوعامدىق ءتارتىپ پەن قاۋىپسىزدىكتى قاداعالاۋدا»، - دەپ ءمالىم ەتتى م. دەمەۋوۆ.
ىشكى ىستەر ۆيتسە-ءمينيسترىنىڭ حابارلاعانىنداي، جالپى، ىشكى ىستەر ورگاندارىنىڭ جەكە قۇرامى 17 - 24- ناۋرىز ارالىعىندا كۇشەيتىلگەن رەجيمدە جۇمىس ىستەيدى. ولاردىڭ جۇمىسىن ۇيلەستىرۋ ءۇشىن ىشكى ىستەر مينيسترلىگى مەن اۋماقتىق ىشكى ىستەر دەپارتامەنتتەرىندە ارنايى شتابتار قۇرىلعان.
«باسشىلىق پەن كوماندالىق قۇرام تاۋلىك بويى كەزەكشىلىك اتقارىپ ءجۇر. ەلدى مەكەندەردە قوسىمشا كۇش تارتۋ ارقىلى پاترۋلدەر سانى كوبەيىپ، ولاردىڭ ءبىرازى سايلاۋ ۋچاسكەلەرىنە جاقىن اۋماقتارعا ورنالاستىرىلدى. بارلىق قالاداعى اۋدانداردا 2-3 تەن موبيلدى جەدەل-تەرگەۋ توپتارى قۇرىلىپ، توپ قۇرامىنا پروكۋراتۋرا وكىلدەرى دە قوسىلعان»، - دەپ اتاپ ءوتتى م. دەمەۋوۆ.
ەڭ باستى ايتا كەتەرلىگى، م. دەمەۋوۆتىڭ حابارلاۋىنشا، ىشكى ىستەر ورگاندارى بۇكىل سايلاۋ ۋچاسكەلەرىن كۇنى-ءتۇنى كۇزەتكە العان. «سونداي-اق، بۇگىن، سايلاۋ كۇنى جولدارداعى قاۋىپسىزدىك قاتتى باقىلانىپ، ءورت سوندىرۋشىلەر مەن قۇتقارۋشى بولىمشەلەر دە كۇشەيتىلگەن كەستەدەگى جۇمىسقا كوشكەن»، - دەپ اتاپ ءوتتى م. دەمەۋوۆ.
ەستەرىڭىزگە سالا كەتەيىك، بۇگىن قازاقستان رەسپۋبليكاسىندا پارلامەنت ءماجىلىسىنىڭ جانە بارلىق دەڭگەيدەگى ءماسليحات سايلاۋى ءوتىپ جاتىر. قازاقستان مەن شەت ەلدەردى قوسا العاندا، بارلىعى 9840 سايلاۋ ۋچاسكەسىندە تاڭعى ساعات 07.00 دەن بەرى داۋىس بەرۋ ءجۇرىپ جاتىر. داۋىس بەرۋ كەشكى ساعات 20,00 دە اياقتالادى.
ءماجىلىس سايلاۋىنا التى ساياسي پارتيا سايلاۋعا قاتىسۋدا. بارلىق پارتيالاردى قوسقاندا، ق ر پارلامەنت ءماجىلىسى دەپۋتتاتتىعىنا ۇمىتكەر رەتىندە 234 كانديداتتىڭ ءتىزىمى بەكىتىلگەن.
اۆتور: كەنجەكەي توقتامۇرات قىزى
