ەلىمىزدىڭ باس ءمۇفتيى مەن قازاقستان ميتروپوليتى «قازاقستان حالقى اسسامبلەياسىنا 20 جىل» ەستەلىك مەدالىمەن ماراپاتتالدى - فوتو

استانا. قازاقپارات - بۇگىن ق ر مادەنيەت جانە سپورت ءمينيسترى ارىستانبەك مۇحامەدي ۇلى قازاقستان مۇسىلماندارى ءدىني باسقارماسىنىڭ ءتوراعاسى، باس مۋفتي ەرجان مالعاجى ۇلى مەن ق ر- داعى ورىس پراۆوسلاۆ شىركەۋىنىڭ ميتروپوليت وكرۋگىنىڭ باسشىسى، استانا جانە قازاقستان ميتروپوليتى الەكساندرعا مەملەكەتتىك جانە قوعامدىق قىزمەتتە قول جەتكىزگەن جەتىستىكتەرى ءۇشىن «قازاقستان حالقى اسسامبلەياسىنا 20 جىل» ەستەلىك مەدالىن تاپسىردى.

«بۇگىنگى تاڭدا بىرلىگى مەن ىنتىماعى جاراسقان ەل قازاقستان ەكەندىگى دۇنيە جۇزىنە بەلگىلى. ارينە، ەلىمىزدەگى بىرلىك پەن ىنتىماقتىڭ جاراسۋى ەڭ الدىمەن ەلباسىمىز نۇرسۇلتان نازاربايەۆتىڭ وراسان زور ەڭبەگىنىڭ ارقاسى»، - دەپ اتاپ ءوتتى مينيستر ماراپاتتاردى تاپسىرۋ راسىمىندە.

سونىمەن قاتار ول ەلىمىزدە بيىل قازاقستان حالقى اسسامبلەياسىنىڭ 20 جىلدىعى، قازاق حاندىعىنىڭ 550 جىلدىعى مەن جەڭىستىڭ 70 جىلدىق مەرەيتويى كەڭىنەن اتالىپ ءوتىلىپ جاتقانىن ەسكە سالدى.

«وسى شارالاردىڭ اياسىندا ەلباسىمىزدىڭ جارلىعىمەن باس مۋفتي ەرجان مالعاجى ۇلى مەن استانا جانە قازاقستان ميتروپوليتى الەكساندر «قازاقستان حالقى اسسامبلەياسىنا 20 جىل» مەرەيتويلىق مەدالىمەن ماراپاتتالدى»، - دەدى ا. مۇحامەدي ۇلى.

اۆتور: مارلان جيەمباي