بەيجىڭدە 207- سايلاۋ ۋچاسكەسى جۇمىسىنىڭ ءبىرىنشى ساعاتىندا 60 تان استام ادام داۋىس بەردى - فوتو
ۋچاسكە اشىلعاننان باستاپ ءبىر ساعات ىشىندە (استانا ۋاقىتى بويىنشا 05:00 دەن 06:00 گە دەيىن) 60 تان استام ادام داۋىس بەردى. بۇل تۋرالى قازاقپاراتقا بەرگەن سۇحباتىندا ۋچاسكەنىڭ سايلاۋ كوميسسياسىنىڭ ءتوراعاسى ماناربەك قابازيەۆ حابارلادى.
قازاقستان رەسپۋبليكاسىنىڭ ءانۇرانىن ورىنداعاننان كەيىن العاشقى بولىپ ديپلوماتيالىق وكىلدىك باسشىسى شاحرات نۇرىشيەۆ پەن ونىڭ زايىبى داۋىس بەردى.
ودان كەيىن بەيجىڭدە جۇمىس ساپارىمەن جۇرگەن ق ر اۋىل شارۋاشىلىعى ۆيتسە-ءمينيسترى گۇلميرا يسايەۆا جانە ونىڭ ۆەدومستۆوسىنىڭ قىزمەتكەرلەرى، ديپلوماتتار، ولاردىڭ وتباسى مۇشەلەرى، ۇلتتىق كومپانيا وكىلدەرى ءوز كونستيتۋتسيالىق قۇقىعىن ورىندادى.
العاشقىلاردىڭ ءبىرى بولىپ بەيجىڭ ءتىل جانە مادەنيەت ۋنيۆەرسيتەتىنىڭ تىلدىك كۋرسىندا ءبىلىم الىپ جاتقان 18 جاستاعى كاميلا اتيەۆا داۋىس بەردى، ول ەستەلىككە كادەسىي الدى.
اسپاناستى ەلى استاناسىنا قىزمەتتىك ماسەلەلەرمەن كەلگەن جۇلدىزبەك سەراليەۆ 207-سايلاۋ ۋچاسكەسىندە داۋىس بەرۋ بارىسىندا قازاقستاندىقتاردىڭ بەلسەندىلىگىنە وڭ باعا بەردى.
شاڭحاي ىنتىماقتاستىق ۇيىمى باس حاتشىسىنىڭ ورىنباسارى سابىر يماندوسوۆتىڭ جۇبايى 70 جاستاعى ءمانسيا يماندوسوۆا ەستەلىككە سىيلىق الدى. ول سايلاۋ ۋچاسكەسىنىڭ جۇمىسىنىڭ ۇيىمداستىرىلۋى جوعارى دەڭگەيدە ەكەنىن اتاپ ءوتتى. ۇلكەنگە دەگەن قۇرمەتى ءۇشىن العىس سەزىمىن جەتكىزدى.
«ءبىز اعا بۋىن قازاقستان رەسپۋبليكاسىنىڭ بولاشاعىن ويلايمىز. سايلاۋ - بۇل وتانىمىزدىڭ ماڭىزدى شاراسى. ەلدىڭ گۇلدەنگەنىن، العا قويعان جوسپارلاردىڭ ورىندالعانىن قالايمىز. سوندىقتان دا شىن جۇرەگىمىزبەن قولداپ، سايلاۋعا قاتىسۋدامىز»، - دەدى ول قازاقپارات تىلشىسىنە بەرگەن سۇحباتىندا.
