قازاقستان حالقى 2050-جىلعا قاراي قانشا ميلليون ادامعا جەتەدى
بۇل تۋرالى قازاقپارات ەڭبەك رەسۋرستارىن دامىتۋ ورتالىعىنا سىلتەمە جاساپ حابارلايدى.
ورتالىقتىڭ ۇزاق مەرزىمدى بولجامىنا قاراعاندا، ءوسۋ قارقىنى جىلىنا 1,1-1,4 پايىز شەگىندە وزگەرەدى، ورتاشا جىلدىق ءوسۋ قارقىنى (ءو ج و ق) 1,3 پايىز، وپتيميستىك نۇسقاسىندا - 1,4-1,7 پايىز (ءو ج و ق 1,5 پايىز)، پەسسيميستىك نۇسقاسىندا - 0,7-1,1 پايىز (ءو ج و ق 0,9 پايىز).
2022-2050-جىلدارى جاڭا تۋعان نارەستەلەر سانى 14,3 ميلليون ادامدى، قايتىس بولعاندار سانى 5,5 ميلليون ادامدى قۇرايدى. وسىلايشا، تابيعي ءوسىم 8,8 ميلليون ادامدى قۇرايدى. الايدا، كوشى-قوننىڭ تەرىس سالدوسىنا بايلانىستى (565 مىڭ ادام) 2050-جىلعا قاراي حالىقتىڭ تازا ءوسىمى 8,2 ميلليون ادامدى قۇرايدى.
قوسىمشا شارالارسىز حالىقتىڭ ءوڭىرارا بىركەلكى بولىنبەۋى كۇشەيتىلەتىن بولادى. 2050-جىلعا قاراي سەگىز ءوڭىردىڭ حالىق سانى 869 مىڭ ادامعا قىسقارۋى مۇمكىن، ولاردىڭ قاتارىنا اباي (92 مىڭعا)، اقمولا (80 مىڭعا)، قاراعاندى (99 مىڭعا)، قوستاناي (181 مىڭعا)، پاۆلودار (100 مىڭعا)، سولتۇستىك قازاقستان (182 مىڭعا)، ۇلىتاۋ (15 مىڭعا)، شىعىس-قازاقستان (120 مىڭعا) وبلىستارى كىرەدى.
سونىمەن قاتار قالعان وڭىرلەردەگى حالىق سانى 9 ميلليون ادامعا ءوسۋى مۇمكىن، ونىڭ ىشىندە استانا، الماتى جانە شىمكەنت قالالارىندا 4,2 ميلليون ادامعا ۇلعايماق. بۇدان بولەك حالىق سانىنىڭ ءوسۋى اقتوبە (326 مىڭ)، الماتى (800 مىڭ)، اتىراۋ (350 مىڭ)، باتىس قازاقستان (112 مىڭ)، جامبىل (657 مىڭ)، جەتىسۋ (512 مىڭ)، قىزىلوردا (328 مىڭ)، ماڭعىستاۋ (723 مىڭ) جانە تۇركىستان (994 مىڭ ادامعا) وبلىستارىندا كۇتىلەدى.
